حال البلد والتغيير الذى اصبح ضروره

بلد حالها يسر العدو ولا يسر الحبيب، بلد مع كل طلعة شمس العالم يسبقنا بخطوات واحنا نتقهقر لورا، مابقناش فالحين حتى فى الزراعه اللى كان بيضربوا بالقطن المصرى زمان المثل دلوقتى راحت عليه، وطبعا فى الصناعه يا قلبى لا تحزن مش فالحين غير فى الشيبسى واللبان والكاراتيه لكن صناعات تقيله ماتلاقيش.

بلد بتصرف على البحث العلمى 0.02% من اجمالى الناتج القومى بتاعها فى حين ان باقى الدول الناميه بتصرف 1% مستنى منها ايه؟؟

ولا بحث علمى ايه اللى باتكلم عليه مش لما نشوف التعليم اللى بايظ الأول.. الطلبه اللى ما بتروحش المدارس والأستاذه اللى ماعندهاش ضمير والمناهج والكتب الدراسيه اللى عفا عليها الزمان والامتحانات المتسربه من الاخر منظومه كلها على بعضها مش نافعه.

والفساد والرشاوى المنتشره فى جميع قطاعات البلد، بصراحه مش عارف هنلاقيها منين ولا منين، كل ده طبعا والحكومه بريسها لا حول لهم ولا قوه صحيح ده غير ملف الصحه اللى لو فتحناه مش هيتقفل الشعب مليان امراض مزمنه واعلى مستويات الكبد الوبائى فى مصر.

وعلى مستوى التمثيل الدولى سيبك من الرياده العربيه الشرق اوسطيه اللى واجعين بيها دماغنا فى الصحف بتاعتهم، ما بقلناش اى دور يذكر ايران وتركيا والسعوديه على استحياء بقوا همه اللى واخدين الدور ده... خلينا احنا فى ديل امريكا كفايه علينا.

من الاخر البلد متجهه الى الفجوه السوداء ده اذا مكناش دخلناها خلاص، ورغم كده تلاقى ناش متمسكه بالنظام وقال ايه عايزين يورثوا البلد كمان، ما شوفتش انا بجاحه اكتر من كده.. ايه الجبروت ده

انتوا عارفين ايه الحاجه الوحيده اللى نظام فالح فيها اقولكم انا ايه هى حشد عساكر الأمن المركزى لغايه ما وصلوا مليون ونص عسكرى لحماية نفسه، بص كده على اى مظاهره حتلاقيهم مثلا مية مواطن قدامهم 200 عسكرى محواطينهوم ورتب كبيره وعربات مصفحه...ايه كل ده، ده اذا دل فإنما يدل على رعب النظام من الشعب.

من الأخر لا سبيل للبلد دى من النهوض الا بالتغيير، المفروض كل واحد يعمل اللى عليه ومانسبش البلد تغرق بينا وبيتهيألى البرادعى هو أملنا الوحيد اذا كان فى اصلاح دستورى لتغيير حال البلد السودوى...بس خلاص قلت الكلمتين اللى فى قلبى.