جاوز الظالمون المدى

جاوز الظالمون المدى.. اغنيه لمحمد عبدالوهاب غناها زمان ماكنش يعرف انها ستظل فاعله حتى يومنا هذا... أهديها للحكام العرب

عار علينا

عار علينا ما يحدث لإخواننا الفلسطنين فى غزه ونحن نقف مكتوفى الأيدى نشاهد ما يحدث لهم بدم بارد، ان ما يحدث من الدوله الصهيونيه تجاه هذا الشعب الأعزل من مذبحه الان تتم سقط فيها اكثر من مئة شهيد إنما دماؤهم تلطخ ايدى جميع الحكام العرب وأولهم مبارك الذى استقبل قبل عدة ايام وزيرة الخارجيه الإسرائيليه ليفنى لتصرح هنا من قلب القاهره انها ماضيه لإبادة حماس.

واخشى ان دماء هؤلاء الشهداء امتدت لتلطخ ايدينا نحن الآخرون بصمتنا على تلك الحكومات المتخاذله التى تركت هذا الشعب المسكين يعانى وحيداً ليسقط منه الأطفال الأبرياء قتلى دون ذنب اقترفوه سوى انهم فلسطنين ظنوا ان لهم اخوة من الشعب العربى سيهبوا لنصرتهم!

 

ان من يمدون العدو الاسرائيلى بالنفط والغاز ليمدوا به جيوشهم لهم شركاء فى هذه المذبحه التى تتم الآن ، بأى وجهه سيقفون امام بارئهم عند السؤال يوم القيامه؟؟

حان الوقت لدعم المقاومه الفلسطنينه بشتى الطرق تجاه هذا العدوان، إلى متى الصمت يا عرب إلى متى؟؟ 

جف الحبر من الأقلام وجفت الحلوق من كثرة الكلام ولا فائده وسيبقى الوضع كما هو عليه طالما ظللنا صامتين نتكلم دون افعال...

مصر يا أم الدنيا .... أليست غزه من الدنيا   (لافته رفعها متظاهرون اردنيون فى عمان)

ما هو اهم حدث؟؟؟

كمان كام يوم هتدخل علينا سنه هجريه وميلاديه جديده لا يفصل بينهما سوى كام يوم.

استعرضت السنه اللى فاتت عشان اشوف ايه هى اهم الأحداث اللى انا مريت بيها على المتوى الشخصى لاقتها كالتالى:

انشاء هذه المدونه وكتابة اول تدوينه

خدت اعفاء نهائى من الجيش بعد الـ 3 سنين التأجيل

سيبت الشركه اللى اشتغلت فيها 3 سنين

حفلة الوداع اللى عملها لى اصحابى بتوع الشركه القديمه لما جيت ماشى (وانتهزها فرصه واشكرهم جامد على مشاعرهم الجميله)

اول يوم عمل فى الشركه الجديده

زواج وخطوبة عدد من الأصحاب والأقارب

لغاية دلوقتى ما اتجوزتش ولا حتى خطبت

دى ممكن تكون  بعض اهم الأحداث اللى مريت بيها ان لم تخونى الذاكره

يا ترى انت ايه اهم الأحداث اللى مريت بيها؟؟

 

عذراً غزه

عذراً غزه، فالكل تأمر عليكى...

لك الله

منتهى البجاحه...!!

فعلاً منتهى البجاحه... وزير الصحه السعودى طالع يقول ان بلده ليست فى حاجه الى الأطباء المصريين وانهم ممكن يستقدموا أطباء من جنسيات تانيه مختلفه اكفأ وامهر من الأطباء المصريين!! (سكتناله .. دخل بحماره)
طيب لما انتوا فالحين اوى كده بتنزلوا اعلانات ليه كل شويه انكم عايزين اطباء مصريين!!!
ولا هو بعد ما علمّناكوا خلاص بقيتوا مش محتاجين، فعلاً سحقاً للنظام الصامت المستكين اللى خلىّ كل من هب ودب يتطاول علينا.
فين الخارجيه المصريه؟؟ والسفير المصرى فى السعوديه؟؟ لا حس ولا خبر..
بجد انا هاموت من الغيظ مش قادر، مسلسل الإهانات مستمر ومفيش اى اجراءات من الجانب المصرى؟؟
طيب قولنا الحكومه سلبيه ملهاش موقف، فين نواب المعارضه فى مجلس الشعب وعلى رأى صديقتى -صاحبة مدونة فانتازيا كمان وكمان- فين نواب الاخوان الا ما شفنا استجواب فى القضايا المهمه دى ولا حاجه مواقفهم غامضه؟
طيب بلاش طب فين الأطباء المصريين اللى هناك فى السعوديه مش عارفين حتى يعملوا وقفه مع اخوانهم المحكوم عليهم بالظلم والافترا تحت شعار تطبيق الشريعه؟؟ اى شريعه اللى بيتكلموا عليها دى انا مش عارف؟؟
للأسف النظام الجاثم على صدورنا اثر فينا حتى اننا بره فى بلاد الغربه مش عارفين نبقى جنب بعض وناخد موقف موحد ؟؟
رحماك ياربى بالشعب المصرى المسكين المضطهد بره وجوه...

فريق تفخر بتشجيعه...

بجد فريق يدعوك للفخر انك منتمى اليه ولو حتى بصفتك مشجع...
الف مبروك للأهلى وكل جماهيره البطوله الافريقيه السادسه وكل الأرقام القياسيه اللى الأهلى عمّال يحطمها واحد تلو الآخر...
الف الف مبرووووووووووك وعقبال اليابان ان شاء الله...

أسد علىّ .. وفى الحروب نعامة

أسد علىّ وفى الحروب نعامةُ..

جمله تنطبق حرفياً على قوات الشرطه المهيبه متمثله فى قوات الأمن المركزى التى تم احتجازها بواسطة بدو سيناء..

اللى حصل ان قوات الأمن اطلقت النيران على عرابية دفع رباعى كانت بتغير اتجاهها بعيدا عن الكمين اللى الأمن عامله المهم ان قوات الأمن قتلت 3 من البدو...

شويه والخبر وصل لأهالى الضحايا ..قاموا طلعوا على نقط الأمن وحاصروها..

تخيل بقى حاصروا مين؟؟

البدو حاصروا واحتجزوا عميد.. ايوه بقولك عميد وكمان معاه 51 جندى (نقلاً من مصراوى)

تخيلوا البدو همه اللى حاصروا الأمن مش العكس؟؟ ولولا تتدخل بعض العقلاء من البدو لما تم الإفراج عن العميد ورجالته!!

مبروك يا عادلى يا فرحتك برجالتك!!

فالحين بس تتشطروا على العيال الغلابه بتوع المظاهرات والإضرابات والمواطنين المساكين فى الأقسام..

وفى الأوقات الأهم اللى محتاجه فعلاً الشده طلعتوا اى كلام!!...... دنيا!!

أوباما ... إرادة شعب نحو التغيير

اليوم احتفل المرشح الديموقراطى لمنصب الرئاسه باراك أوباما بفوزه التاريخى برئاسه الولايات المتحده الأمريكيه لمدة أربع سنوات قادمه يبدأها فى العشرين من شهر يناير القادم عندما يتسلم مكانه فى البيت الأبيض من جورج بوش.

الجميل فى الأمر انك تمتعت بمنافسه حقيقه بين حزبين وفكرين.. كلاً قدم فكره وبرنامجه ولك حرية الإختيار دون تدخل من سلطة ما ذات نفوذ لتزور النتائج لصالح هذا أو ذاك، ولذلك ترى تدفق الشعب الأمريكى نحو صناديق الإنتخاب لأنهم يعلمون ان اصواتهم مؤثره وانه لن يتم التلاعب بأصواتهم.... بلد تمارس الديموقراطيه والحريه الإنتخابيه بشكل يدرس..

فهاهو الشعب الأمريكى الذى يمثل كل قوامه تقريباً العرق الأبيض يختار رئيساً من أصول افريقيه...

وبعد اعلان النتائج راينا المهزوم يخرج يهنىء الفائز بل ويخاطب الشعب الأمريكى ليقف بجوار الرئيس الجديد، والفائز يخرج ليقول انه سيتعاون مع المهزوم من اجل صالح البلد.

هذه الأحداث كلها تجرى فى ظل التعديلات الدستوريه الحادثه فى البلاد العربيه واقربها الجزائر لكى يمنح الدستور الرئيس مدد مفتوحه فى الرئاسه ومن قبلها مصر وتونس وجميع البلدان العربيه التى انتهكت حقوق شعوبها فى ظل استفتاءات واهيه معلوم نتائجها مسبقاً..

لا أعلم متى نرى ارادة الشعوب العربيه كإرادة الشعب الأمريكى... فالتغيير لا يأتى ليطرق الباب وانت متكىء على الأريكه بل يجب ان تنهض لتسعى اليه حتى تناله.

مبرووووك لأوباما والشعب الأمريكى..... وعقبالنا!!

كلهن ليلى!!

من بداية حملة كلهن ليلى وحتى الآن ... تصفحت معظم المدونات التى دلت بدلوها فى تلك القضيه..

فوجدت ان كل "الليلاوات" قد ارتدين جلباب المغلوبات على امرهن المظلومات.... المعرضون للقهر على ايدى الوحوش الكاسره المسماه بالرجال..

كلهن ضحايا...

كلهن نظرن الى الجانب المظلم السودوى السلبى...

نظرن الى من استباح راتب زوجته العامله .. ولم بنظرن الى من اثقلت كاهل زوجها محدود الدخل بالطلبات الغير ضروريه والكماليات وعيّرته بضيق ذات يده حتى دفعته للسرقه او الإختلاس!!

ولم ينظرن الى الرجل الذى ترك البلاد وسافر بحثاً على توقير حياه رغده لزوجته فأخذت كل مدخراته ووضعتها فى البنوك باسمها وعندما عاد اخذت المال وتركته كما ذهب!!

المهم ... قصدى زى ما انتوا فيكوا المقهورات المظلومات ..ففيكن ايضاً المتسلطات الظالمات..

وعلى فكره بقى اذا كنتن كلكن ليلى... فكلنا حسنين!!

Today:Global Hand washing Day

النهارده........ اليوم العالمى لغسيل الأيدى...

اغسلوا اديكوا كويس النهارده .. ماتفضحوناش!!

مفترق طرق...

من بعد العيد وانا اعيش حاله من التشتت الفكرى ...

وذلك نتيجه لبعض القرارات الهامه التى انا بصدد اتخاذها، وسبحان الله كلها كده جت مع بعضها؟؟

قرارات هامه مصيريه... انا حاسس انى فى مفترق طرق......... الله اعلم اخرته ايه؟؟

والتردد داء ملعون ميخلكش تعرف تاخد القرار الصح...

اللهم اعنى على اتخاذ القرار المناسب...

ألف مبروووك

ألف مبروووووووووووووك العفو الرئاسى

ليس هذا

ليس هذا من يستحق الحبس .... بل آخرون جميعنا نعلمهم جيداً

عيد سعيد عليكو

كل عام وانتم بخير

رمضانيات

يمتاز شهر رمضان بجو جميل ليس له مثيل فى باقى الشهور

لمّة العيله اللى مابيشفوش بعض الإ فى المناسبات بتقوى صلة الرحم

الغذاء الروحانى الكبير من العبادات .. الصيام والقيام والزكاه .. كل ده بيديك طاقه روحانيه هائله تمشيك طول السنه لغاية رمضان اللى بعده..

مش عارف كده بحس ان شوارع البلد بتكتسى بجو جميل كده مش عارف اوصفه غير انه رمضانى.. لما تلاقى المساجد مليانه بالمصلين اللى منتظرين عفو ورحمة ربنا .. والشوارع المتزينه بالأنوار والزينه.. وموائد الرحمن والسحور فى الحسين أوالسيده..

جو المسحراتى والفانوس وبتاع الكنافه اللى بينصب نصبته من السنه للسنه..

حاجات كده بيتهيألى متلاقيهاش غير عندنا فى مصر

حاجات الواحد بيستناها من السنه للسنه...

اللهم أعنّا على صيام وقيام شهر رمضان إيماناً وإحتساباً وتقبله منا يارب العالمين

خيبه........ بالويبه

انا بصراحه مش عارف البلد دى فالحه فى ايه مافيش حاجه فالحين فيها غير الخيبه والوكسه يمكن هى دى الحاجه الوحيده اللى يمكن ننفرد بالصداره فيها عن باقى دول العالم....

حريقه مجلس الشورى ... اللى قعدت يومين ومحدش عرف يطفيها مش عارف 120 عربية مطافى و طيارات هليكوبتر بتاعه القوات المسحله بصراحه حاجه تكسف مفيش اى تخطيط او اداره للأزمات؟؟ والحمد لله ان ربنا ستر عالم بحالنا...

ولا الخيبه الكبرى فى بكين... 80 مليون بنى ادم مش عارفين يطلعوا بطل أوليمبى؟؟ حاجه تكسف!!
فيليبس الأمريكى بتاع السباحه جاب لوحده 8 ميداليات ذهب!!
والبحرين مع احترامى ليها اللى عدد سكانها مايجيش عشر سكان القاهره بس جابت ذهبيه واحنا 80 مليون ولكن كغثاء السيل مالوش فايده..
حاجه مسخره ورايحين يتخنقوا هناك .. قال الحكايه ناقصه فضايح..

رياضة ايه اللى بدور عليها مش لما البلد حالها ينصلح الأول فى التعليم ولا الصحه نبقى ندور بعد كده على الرياضه..
لأ ويقولك رياده عربيه .. ومصر أم الدنيا مش عارف أم الدنيا فى ايه؟؟؟.....فى الخيبه القويه

نفسى ..........

نفسى فى يومين إستجمام على البحر بدون اى هموم او مشاكل او تفكير فى الغد.........

حتى المترو... عمار يا مصر؟!!

بسرعه كده ومن غير لف و دوران ومقدمات ملهاش لازمه...

إذا كنت ركبت مترو الأنفاق امبارح ما بين الساعه الثالثه وحتى السابعه مساء.. وقاعد بتقرأ الكلام ده دلوقت فأحمد ربنا وبوس ايدك وش وضهر انك لسه عايش.. وإذا كنت مركبتوش من أساسه امبارح(زى حالاتى) فأنت سعيد الحظ برضه...

عارف ليه سيادتك؟

لأن فى الفتره الزمنيه دى يا معلم اللى هى اربع ساعات كامله كانت سيادتك غرفة التحكم الرئيسيه اللى فى رمسيس مش عارفه أمكان قطارات المترو ...فين؟؟؟؟

ايوه بجد مش بهزر ولا جايب الكلام ده من عندى .... الكلام ده منشور فى جريده المصرى اليوم النهارده وده سعادتك علشان كابل التحكم المسئول عن الكلام ده مقطوع ؟؟؟ وكانوا بيطمنوا على أمكان القطارات بالموبايلات ؟؟؟
وعمار يا مصر...

وداعاً عبدالوهاب المسيرى..

لا أجد ما أكتبه لأرثى د. عبدالوهاب المسيرى.....
إنا لله وإنا إليه راجعون
رحيل عالم وكاتب ومفكر وسياسى.. تنعاه مصر والمصريين اللى بجد....
لا يسعنى الوقت لسرد إنجازاته، ولكن كفايه ان نقول انه مواطن مصرى يحب مصر بجد ..
كفايه انه فى ايامه الأخيره كان بيصارع المرض وكان بينزل المظاهرات ويستحمل المضايقات الأمنيه ولا شباب العشرين.. ليضرب للشباب المثال والقدوه.
وابت الحكومه ان تعالجه على نفقتها لأنها تفرغت لعلاج الرقصين والفنانين وتركت عقول مصر المفكره..
وتكفل بعلاجه أمير سعودى... حكومه تكسف
رحم الله رجل اثرى المكتبه العربيه والمصريه ولم يضن عليها بأى جهد او ذرة عرق
وفعلت خير الحكومه حينما لم تتواجد فى تشييع جنازته.. فشيعها شرفاء ومفكرين البلد..
رحمك الله واسكنك فسيح جناته... فأنت فى قلب و وجدان كل مصرى..

إلى وزيرى التضامن الإجتماعى.. والصحه!!

بما اننا فى زمن التطور الطبيعى للحاجه الساقعه وكل حاجه تانيه.. فقد ساقنى حظى العثر أن أكون شاهداً على التطور الطبيعى لرغيف العيش..
واحد يقولى إشطه هو الرغيف اتطور .. اقوله أنا متفرحش اوى كده وركز فى اللى جاى...

بص يا معلم .. وأنا قاعد بتغدى لا بيا ولا عليا .. هب مدت ايدى وخدت رغبف معرفش ايه اللى خلانى اعمل حركه زى دى مع انى مش من اكيلة العيش اوى، لكن القدر لازم يلعب دوروه ..

المهم (خد بالك من اللى جاى ده) كلت منه بضع لقيمات، ومعرفش ايه الهاتف اللى جانى وخلانى بعد ما كلت من الرغيف انى اقسمه نصين؟؟ علشان يمكن حسيت انى مش هاقدر اكمله ؟؟ جايز.. المهم .. بعد تقريباً ما تلات اربع الرغيف اتقسم ولسه داخل على الربع الأخير لقيتلك حاجه سوده مديه على رمادى فى قلب الرغيف من جوه..
دققت النظر شويه... اده؟؟ ياااااااااااااااااااااااع ... ايه القرف ده؟ دوده فى قلب الرغيف.. وجتلى حالة غثيان و قمت طبعاً سايب الأكل ومقدرتش أكمل..

شوفت بقى التطور الطبيعى للرغيف بعد المسمار تلاقى دوده أو شىء من فصيلة الحشرات (دقق فى الصوره.. معلش ممكن متبقاش باينه اوى لأنها بكاميرة الموبايل بتاعى)
يمكن علشان الحديد دلوقتى مولع نار ومحدش لاقيه فا مبقاش فيه مسامير فدوروا على حاجه تانيه كبديل!!

ممكن واحد يقولى يا حظك ان انت قدرت تجيب رغيف اصلاً، جاى تدورلى على جودة الرغيف مش لما نلاقيه؟؟!!

المهم انا بابعت الموضوع ده للسيدان وزيرى الصحه والتضامن الإجتماعى.. وعمار يا مصر..

المركب اللى تودى

و فجأه بينما هم منهمكون فى اداء عملهم اليومى، إذ دلف أحدهم إلى الغرفه وقال لهم: مش فلان الفلانى اتنقل مش عارف فين (حته ورا الشمس كده بشويه)
ولأن فلان الفلانى هذا يتمتع بشعبيه جارفه ولكن من الجهه السلبيه، تهللت أساريرهم وصاحوا فى صوت واحد كأنهم اتفقوا عليه مسبقاً:
المركب اللى تودى...

دايماً الواحد لما يكون مخنوق من حد، وبعدين يعرف انه راح مش عارف فين يقول بتلقائيه المركب اللى تودى... لأنه كان قرفان منه وكان كابس على مراوحوه.

مش عارف عدى على وقت كده زهقت من تصرفات وسلوك ناس بعينهم حولي، عارف انت كده فى ناس تحاول تبلعها متعرفش تلقيهم واقفين فى زورك، فجت فى بالى الفكره دى ليه نبقى سلبيين ونستنى لما يغوروا ونقول المركب اللى تودى؟؟
ليه احنا ما نسعاش ونجيب المركب دى ونوديهم؟؟

جت فى بالى الفكره دى وقعدت اسرح بخيالى، ياسلاااااااام لو جبت فلان وعلان وفلانه دول وقمت حاجزلهم على متن المركب اللى تودى دى! واذ احنا فى الميناء وانا بودعهم واديهم التذاكر وقلبى يقفز ويرقص فرحاً، ينساب صوت المذيعه الداخليه.. النداء الأخير على الساده ركاب المركب "اللى تودى" الصعود على متن المركب المتجه الى القاره القطبيه الجنوبيه (انتركاتيكا) فوراً، وهُب بسرعه بسرعه يركبوا المركب واستريح من وشهم.

يااااااااااسلااااااااااام، حلم جميل كان نفسى يبقى حقيقه، بس رجعت واصطدمت بالواقع...... هى دى الحياه لازم تشوف فيها من كل صنف ولون ولازم تتعايش مع الأشكال دى، ولازم تواجهه مشاكلك ماتهربش منها، وفى اقرب فرصه تحجزلهم على متن "المركب اللى تودى".

60 سنه على النكبه..والغاز

فى هذا الشهر من هذه السنه يمر 60 سنه بالتمام والكمال على احتلال إسرائيل للأراضى الفلسطينيه....
60 سنه من المعاناه والذل والهوان على الشعب الفلسطينى المسكين.... تشريد وتهجير وقتل واغتصاب للأرض والحقوق..
60 عام من سفك الدماء الفلسطينيه رجال وشيوخ، نساء وأطفال .....
60 عام من الوحشيه واللا آداميه....
60 عام من الصمت والهوان العربى قبل العالمى على المذابح والإنتهاكات الصهيونيه....





وبهذه المناسبه بدء ضخ الغاز المصرى رسمياً للكيان الصهيونى بأبخس الأسعار التى لاتقارن بالأسعار العالميه...
وذلك نظراً للحاله الإقتصاديه المزدهره التى تعيشها مصر، ومستوى دخل الفرد العاااااالى، وتخطى جميع فئات الشعب خط الفقر،،،
فبناء على ذلك قررت مصر دعم الشعب الصهيونى الفقير المسكين !! كى يستطيع امداد ترساناته العسكريه بالوقود اللازم لكى تشوف شغلها مع الشعب الفلسطينى على أكمل وجهه!!!

القفا المتين... للشعب المسكين!!

لم تكد الناس تفرح بالعلاوه الـ 30% حتى اعلن مجلس الشعب اليوم بدء مناقشاته زيادات بعض الأسعار ورفع الضرائب على بعض المنتجات والمؤسسات، وإن كانت السلعه الأهم التى تنوى الحكومه رفعها هى الوقود بشتى انواعه...

فبص كده يا معلم وصحصح معايا:
البنزين 95 هيتباع بسعر 250 قرش، والبنزين 92 هيتباع بسعر 185 قرش، والبنزين 90 هيتباع بسعر 175 قرش، والسولار هيتباع بسعر 110 قرش....
أى ان ما أعطته الحكومه باليمين هتاخده اضعاف مضاعفه بالشمال...

وللى ماعندوش فكره وفاكر ان اسعار ارتفاع الوقود هتعود على اصحاب السيارات بس، اقوله انت غلبااااااااان..

ده التأثير المباشر فقط، لكن التأثير الغير مباشر واللى هيعود على الجميع اللى عنده واللى معندوش عربيه هو ان:

1- اسعار المواصلات كلها هتغلى واهمها الميكروباصات التى يركبها الجميع تقريبا يومياً والأنوبيسات والتاكسى و....

2- جميع اسعار السلع، ماتندهش اوى كده!! ايوه جميع اسعار السلع لأن كل السلع بلا استثناء يضاف لسعرها ثمن النقل من المحاصيل الزراعيه اللى بتجيلك من الدلتا والصعيد و.....

وسلملى بقى على الزياده، ده اذا كانت الزياده دى اساساً ليها لازمه، ومتحاولش ترفع لياقة القميص علشان تدارى القفا اللى خدته لأن الشعب كله مش انت لوحدك اللى خدته يا معلم...

واللى يغيظك ان واحد زى عبدالله كمال رئيس تحرير مجلة روزاليوسف العلمانيه يقولك القرار ده جيد جداً (نقلاً من مصراوى) لأن الوقود بيأتى فى المرتبه التاسعه او العاشره من السلع اللى هيزيد سعرها؟؟؟...

لك الله يا شعب مصر المسكين..

السلوك المصرى...زهقت!

بلاش تدوين سياسى النهارده.. خلينا نتكلم عن الشعب المصرى اللى هو انا وانت والناس اللى حوالينا، نظراً لتعددانا السكانى اللى مش كبير الإ لأنه مش متوزع صح على رقعة المساحه للبلد، فكلنا متكتلين فى حته واحده فحسين بالزحمه وما يترتب عليها.. بيقولك يا سيدى ان الزحمه كفيله بزيادة التوتر والسلوك العدوانى عند الناس، وبما ان احنا حياتنا كلها زحمه فبالتالى الكل متعصب ومش طايقه نفسه.. المهم لو حبيت تحلل السلوك المصرى..مش هتلاقى احسن من وسائل المواصلات علشان تحللها لأنها اكبر تجمع لناس من شتى الفئات والناس اللىمختلفين فى اتجاهات التفكير.. فلو نظرنا للأتوبيسات مثلاً: هتلاقى اللى فى حاله وده أندر نوعيه ممكن تلاقيها فى الشعب المصرى! وتلاقى الحشرى اللى حاطط مناخيره فى كل حاجه وده النوع الشائع، وشغال عمال يتكلم فى الفاضيه والمليانه....... يعنى مثلاً الدنيا زحمه فى الطريق، تلاقيه عمال ينصح فى السواق انه يدخل من الحته الفلانيه علشان الزحمه، ويضيع محطات كتير لأنه هيغير الطريق ومش مهم الناس اللى نازله فى المحطات دى اياكش يولعوا... ومره تانيه بس فى مينى باص السواق نفسه هو اللى غير خط مساره وطز فى الناس اللى راكبه ومحدش اعترض غير واحد ولما لاقيته لواحده اعترضت معاه بصراحه الواحد مبيستحملش المواقف دى اللى فيها لامبالاه من الناس..

بلاش سيبك من كل ده وخليك فى المترو اللى هو المفروض من افضل المواصلات فى مصر، هتلاقى الفوضى عامه فى طلوع الناس ونزولهم من المترو يعنى لوفيه راجل او ست كبيره يأما هيداس فى الرجلين او واحد ابن حلال هيديله كتف غير قانونى ينطره على الرصيف،
ده غير الشباب الروش اللى ملزق شعره بغباء ولابس مش عارف ازاى وتلاقيه مطلع الموبايل بتاعه عمال يسمع الخلق اللى عايز واللى مش عايز اغانى رغم أنوفهم وانت وحظك، بس فى الغالب الكل بيشغلوا اغانى بيئه متتسمعش.. ده غير الناس اللى بتيجى تحشر نفسها فى اى مكان وتضايقك تخليلك تحلف انك مش هتركب تانى..

ماشى كل ده وممكن تعديه غصب عنك معندكش بديل حتى لوكنت ممن الميسورين الحال ورحت الشغل بالعربيه هتلاقى السلوك فى السواقه زباله اللى بيكسر عليك واللى معنوش صبر ومش عايز يعديكن ده حتى الناس اللى ماشيه بتعدى من قدام العربيه فى لامبالاه رهيبه كأنه عايزك تدوسه علشان يخلص من حياته والناس اللى بتمشى عكسى وتلاقيها فى وشك قافله الطريق!!!

لكن كله كوم وان السلوكيات دى تظهر فى المساجد كوم تانى.. يعنى مثلاً اقربها النهارده انا بأصلى الجمعهن وخلاص الناس بتصطف للصلاه وكنت واقف جنب عامود.. تلاقى واحد كبير جاى يحشر نفسه بينك وبين العامود والمساحه اصلاً متكفيش فيضيايقك طول الصلاه ويحرمك من التركيز..... يعنى وطول ما أنت ماشى وعايش ياما هتشوف... متسائلاً امتى هينصلح حال سلوكيات الناس دى؟؟؟

لكن السلوك الأساسى والأعم اللى هتلاقيه فى شتى المعاملات والمواقف هو السلبيه واللامبالاه والإنتماء لحزب وأنا مالى، وهو ده اللى مخلينا واصلين للحاله دى من تمادى النظام فى فساده وطغيانه مع ان الناس عارفه الحق وساكته ومابتطالبش بيه ..... وعجبى!! مافيش فايده برضه دخلت على السياسه..!!

الإفراج عن إسراء....و مصير الفيس بوك

اخيرا... تم الإفراج امبارح عن إسراء بعد اعتقالها يوم 6 ابريل بتهمة التحريض على الإضراب..
إسراء صرحت بأنها تلقت معامله جيده داخل السجن وقالت أن ما حدث كان سوء تقدير منها لأنها فقط كانت تعبر عن خواطرها علي الانترنت، مؤكدة علي أنها لن تستخدم موقع فيس بوك الفترة المقبلة. (نقلاً من مصراوى)

بصراحه مش عارف اعلق اقول ايه؟؟ اللى حصل ده سوء تقدير؟؟ بسرعه كده اترجعتى بسرعه كده من أول ألم زى ما بيقولوا؟؟
أكيد التجربه صعبه ان واحد يدخل السجن واستجوابات وأمن دوله والكلام الكبير ده بس على الأقل مايقولوش التصريحات دى؟؟
وقال ايه مش هتستخدم الفيس بوك الفتره المقبله....
خلاص هى حره.. يا خسارة قلقنا وخوفنا عليها ومنادتنا بالإفراج عنها
المهم انها طلعت وخلاص!

وقريت برضه على مصراوى ان فيه اتجاه من الحكومه انها تحجب موقع الفيس بوك..
اهى هى دى الديموقراطيه ولا بلاش...

الدوله البوليسيه....و إسراء

حتى الآن لا تزال إسراء عبدالفتاح صاحبة دعوى اضراب 6 إبريل من خلال جروب الفيس بوك محتجزه لدى الشرطه، رغم اصدار النائب العام حكماً بالإفراج عنها.
وياليت القصه تقف عند هذا الحد فقط بل انها تمتد إلى انه بالإضافه لعدم امتثال الشرطه للقانون والاإفراج عن إسراء فإنها ايضاً لاتكشف عن مكان اعتقالها ... اى انها مخبياها ولاحد يعرف عنها اى اخبار ولا مكان اعتقالها ؟؟
هى دى حقوق الإنسان المحفوظه فى مصر؟؟
هى دى حقوق الإنسان اللى لما البرلمان الأوروبى انتقد مصر علشانها قامت الدنيا ومقعدتش بقيادة فتحى سرور؟؟

ولما عمر عفيفى طلع كتاب يقول للناس حقوقها عند التعامل مع الشرطه وواجباتها... طاردوه وصادروا الكتاب من المكتبات مع ان الكتاب لايتطاول على الشرطه ولكنه بيوعى الشعب.. هى دى برضه حرية الرأى اللى بيتشدق بها النظام ؟؟؟
وقاعدوا يطاردوا الراجل لغاية لما خلوا يسيب البلد خالص ويسافر امريكا...

المهم، انا مش عارف همه ليه لغاية دلوقت معتقيلنها، لاهى زعمية جماعه ارهابيه؟؟ ولا قياديه من قيادات المعارضه..
هى بس افتكرت انها فى بلد فيه حريات وفيه احترم لحقوق الإنسان...
ونسيت انها تعيش فى ظل نظام الدوله البوليسيه التى بان رعبها من شابه لا حول لها ولا قوه
اين منظمات حقوق الإنسان فى مصر.. واين دورها فى الإفراج عن اسراء ومباقى المعتقلين؟؟

احداث المحله..رساله للنظام

الصوره من روريترز لناصر نورى

المحله... اصبحت الان تتصدر اهتمامات كل المصريين لما حدث ويحدث بها..
فعلت ما لم تفعله اى محافظه اخرى فى البلد ثارت ورفعت صوتها عالياً من وطئة النظام المستبد..
تحولت الى ثكنه عسكريه... مصادمات مع الامن الذى بدوره ينفذ الأوامر دون تفكير او عقل راح ضحيته طفل لا ذنب له..
النظام المرعوب لجأ للأمن ليدارى خوفه.. استخدم الطرق الغير مشروعه من ضرب وسحل وتعذيب لارهاب الأهالى علشان محدش يستجرى ويفكر يعترض فاكرين انهم كده بيقضوا على المعارضه فى الشعب ميعرفوش انهم بيزودوا الحقد والعناد اللى عند الشعب وبيزودوا الفجوه بين الشرطه والشعب.

اعتقالات فى جميع المحافظات لكل الناشطين.. زعماء حركة كفايه وغيرهم.. حتى مصور رويترز عبدالناصر نورى اعتقلوه
الخوف مسيطر على النظام ... حتى اسراء عبدالفتاح صاحبة جروب دعوى الإضراب على الفيس بوك معتقيلينها.. النظام خايف من أى
دعوى لإبداء الرأى .. عايز الشعب مغلوب على امره يحركه بالريموت كنترول ..ازاى؟؟

فنظام لم يكفل لمواطنيه عيشه سويه ولا شربة ماء نقيه لم يحميه من ارتفاع الأسعار ومرتباته هزيله والبطاله فى تزايد مستمر والغنى بيزيد غنى والفقير بيزداد فقر.. كل العوامل دى مقدمات لإنفجار اذا النظام ماراجعش نفسه واتحرك فعلا لحل مشاكل الشعب..

فاحداث المحله انذار الشعب للنظام، فلعل النظام يستوعبه ..... اشك!

اضراب 6 ابريل ..نظره تحليليه

الصور نقلاً من موقع إضراب 6 إبريل

بصراحه انا من قبل الإضراب وانا من المتحمسين له، بس كنت حاطط لإضرابى سقف معين وهو انى هاروح الشغل بس مش هاشترى حاجه واهو برضه ابقى ساهمت..

لغاية صلاة العشاء كده وانا خلاص كنت حاطط فى بالى انى رايح، دخلت على النت اشوف ايه اخر اخبار الإضراب لقيت الحكومه منزله بيان على لسان الداخليه قال ايه تحذر المواطنين من الإضراب والتغيب عن العمل والإنسياق وراء القله المنحرفه.. قله منحرفه؟؟؟


طيب.. راحت كبرت فى دماغى وقولت طب انا بقى هاصعد مشاركتى فى الإضراب ومش رايح الشغل علشان ابقى من القله المنحرفه دى اللى بيقولوا عليها وانا عارف انها مش هتكون قله ان شاء الله.
المهم صحيت الصبح قمت مبلغ زميلى فى الشغل انى مش رايح لأنى مضرب، وقعدت على النت اتابع اخبار الإضراب..
لقيت جماعه من المدونين رايحين المحله لتغطية إضراب العمال هناك..كويس العمليه مبشره، المهم مستنى خبر من هنا او من هنا ..مش عارف اوصل..

فتحت التلفزيون، لقيت فى قناة البى بى سى العربيه مراسل من مصنع الغزل بالمحله بيقول ان مفيش اضراب من جانب العمال وان العمل ماشى دون اى بوادر للاضراب........اخ

هنا الضربه الكبيره اكبر تجمع للإضراب واللى كنت حاطط عليه الأمل .. ..فركش!!
ليه كده يا عمال المحله ده انتوا اللى ادتونا الأمل... الأمن حزم المصنع وقلبه ثكنه عسكريه بالإضافه لتظبيطهم بعض القيادات العمّاليه.
متابعه اخرى فى مواقع النت.... الشوارع خاليه وفيه سيوله مروريه كبيره.(كويس يعنى فى ناس كتير مارحتش الشغل..حلو اوى)
بجانب تواجد غزير ومكثف لقوات الأمن المركزى المرعوبه.

هب وسمعت عن مصادمات فى مدينة المحله مع الأمن وقنابل مسيله للدموع وانباء عن مصابين...استر يارب


المهم الحصاد الإجمالى ان انا فى رأى ان الإضراب نجح لعدة أسباب وهى:

1- بيان الحكومه اللى نزلته قبل الإضراب بيوم على لسان الداخليه..( معناه ان صوتنا وصل واتعملوه حساب)

2- التواجد الأمنى المكثف فى ميادين القاهره والجيزه.. حتى انى قريت ان مدير امن الجيزه بنفسه لبس ملكى ونزل يشوف الوضع!
ده معناه ان النظام خايف وجبان..

3- العنف اللى اتقابلت بيه مظاهرات المحله من قنابل مسيله وضرب نار وشتى انواع العنف... يكشف الوجه البوليسى المستبد للنظام.

4- استجابة قطاع كبير من الشعب لعملية الإضراب وتحرره من السلبيه مكسب كبير لخطوات جايه كتير


الخلاصه الإضراب بداية النهايه وبدايه لصحوة الشعب..

6 إبريل ....... مؤيد أم معارض

فى الفتره الأخيره انتشرت دعايا إضراب يوم 6 إبريل بطريقه مكثفه على المدونات ومواقع الإنترنت لتجميع أكبر عدد من الشعب ليتحدوا معاً على شىء واحد وهو إيصال أصواتنا الى ذلك النظام الكارهه لشعبه الغبر عابىء بمسئولياته تجاهه، ليشعروا ان لدينا قوة ضغط ولسنا بائعى كلام او مرددى شعارات بدون أفعال.
وانقسم الناس بين مؤيد ومعارض لهذا الإضراب...

فالمعارض يقول بأ ن النظام لن يعبىء بتلك الإضرابات والمقاطعات وان اللى بيتعمل ده مش هيجيب اى نتيجه ولا أى تأثير..
على العكس تماماً المؤيد فيرى ان الإضرابات وسيله جيده جدا لرفع صوته والتعبير عما بداخله.

وللعلم فإن تلك الإضرابات والمظاهرات السلميه تسبب صداعاً كبيراً فى رأس النظام ولا يهدأ له بال حتى تنتهى، وتستطيع ان ترى ذلك من كثافة قوات الشرطه والأمن المركزى الذين يسدون الشوارع خوفاً من جماعه لا تملك الإ أصواتهم ولافتاتهم المعارضه فلك ان تتخيل جبن النظام من خلال تلك المشاهد.

بصراحه انا من المؤيدين ..... فكفايه فى اليوم ده انك ماتشتريش أى حاجه تضامناً ضد الغلاء الفاحش فى الأسعار.
واضربات العمال الرهيبه التى خير مثال لها إضراب عمال غزل المحله الذى فتح الباب أمام كثير من الموظفين والعاملين المهضومين الحقوق لكى يطالبوا بحقوقهم دون خوف او ذعر، وانى ادعو الله ان يتم اضراب عمال غزل المحله على خير ويتم تحقيق اهدافهم ومطالبهم التى هى شريعه ومطالب لأى موظف او عامل فى اى دوله محترمه.
فالبلد لن تتحرك لأمام طالما ظللنا مكتوفى الأيدى وسلبيين لا نقوم بأى دور لرفع ذلك الظلم الجاثم على صدرونا..

المجتمعون على التفرق

عندى نوبة ملل وزهق من الوضع........ بصراحه انا زهقت من الكلام عن أزمة الغاز اللى مش عايزه تتحل دى.. الحكومة بتقول كلام ميصدقوش عيل صغير.زوإنها مش هى اللى موقعة الإتفاقيه ..الظاهر ان سكان المريخ ظهروا فى مصر ووقعوا الإتفاقيه مع إسرائيل. ولا أزمة العيش كمان اللى ما بتنتهيش وقالوا الجبش هيتدخل وهتتحل .....لما نشوف!!
فقلت افضفض عن حاجه تانيه النهارده وكمان لأنها اسنفزتنى ... وهى القمة العربيه.
عمرو موسى كل شويه يطلع ويقولك هنوجه الدعوه للبنان عادى ومش مشكلة انها ملهاش ريس، واتوجهت الدعوه ، وشويه وطلعت الحكومه اللبنانيه وتقول: لأ يا جماعة انا مش لاعبه ومش هاشارك فى القمة دى........ حلو بانت من اولها اهى لبنان مش هتشارك علشان القمة فى سوريا وفى ما بينهم مشاكل كتير وتوتر.. قولت حد من العرب هيطلع ويقول يا جماعة بلاش هبل امال القمة دى معموله ليه مش علشان تقرب جهات النظر بين العرب؟؟ محدش اتحرك وكأن مافيش حاجه وعادى جداً.
شوية ولاقيت مصر بتقول ان الوفد اللى هيمثلها هيكون برئاسة الوزير / مفيد شهاب؟؟ الريس مالوش مزاج يحضر، وابو الغيط عنده مواعيد مسبقه اصله ما كنش يعرف ميعاد القمة؟؟ وبعدين لاقيت العمليه كملت والرؤساء والملوك العرب بدؤا يتساقطون الواحد تلو الاخر ( السعوديه، الأردن، المغرب، البحرين، العراق،...) ده حتى الملك قابوس بتاع سلطنة عمان مش هيشارك؟؟؟
لما كل دول مش هيحضروا امال قمة ايه اللى هتتعمل، هو صحيح انهم لما كانوا بيتجمعوا كلهم برده ما كانوش بيعملوا حاجه تذكر لكن كان بيقدروا يتجمعوا ...دلوقتى عجزوا حتى عن التجمع مع بعض.. مش عارف ايه السر فى الإنسحابات دى ممكن يكون الضغط الأمريكى زى ما نفت مصر، علشان القمة فى سوريا وسوريا بالنسبه لأمريكا دولة إرهابيه من محور الشر...، ولا علشان إيران مشاركة؟؟؟
المهم المحصله ان القمة منظر بس ولا فى اجتماع للدول العربيه ولا حاجه والخلاصه ان حالنا بقى صعب جداً جداً حتى الإجتماع مش عارفين نجتمعه............

رد الحكومه....السعر سرى

اخيراً ........ وبعد صمت طويل جاء رد الحكومة على مقالات المصرى اليوم للكاتب مجدى الجلاد بخصوص الغاز المصرى المصدر لإسرائيل برخص التراب.
جاء الرد على النحو التالى: أن سعر الغاز سرى ولايجوز التصريح به !!ولكن متوسط سعر الغاز فى الإتفاقية 5 دولار لكل مليون وحدة حرارية.
هكذا جاء رد الحكومة، انا مش عارف ازاى يبقى سرى هو ده مش الغاز اللى المفترض ان هو ملك شعب مصر ازاى السعر يبقى سرى عليه؟؟
الظاهر ان انا نسيت ان انا فى مصر وان الشعب هنا اخر من يعلم وده طبعاً فى ظل سياسة الشفافية التى نحياها!!
وعلى الجهه الاخرى من العالم، روسيا لسه معلنه انها وقعت اتفاقيه مع اوكرانيا لتصدير الغاز ليها بسعر 9 دورلات لكل مليون وحدة حرارية (يعنى السعر اهوه مش سرى ولا حاجه) وفى اتفاقيه دولية برده؟؟؟
الظاهر ان الأمور دى سرية عندنا احنا بس.

الغاز المصرى....إلى أين؟؟

حد منكم قرأ مقالة الكاتب/ مجدى الجلاد فى المصرى اليوم 11/3/2008 ؟؟ الراجل كان بيكمل كلامه عن حكاية الغاز المصرى...
أنا ماكنتش قريت مقالته الأولى اللى كانت المقاله ديه إمتداد ليها، فاسبهليت من الوقائع اللى قالها وأهمها:
مصر بتصدر لإسرائيل الغاز ( 7 مليار متر مكعب سنوياً) بـ 1.5 دولار لكل مليون وحدة حرارية فى حين إنها بتكلفنا 2.65 دولار !!
يا نهار مالوش ألوان!!!!! إيه؟؟ يعنى المفيد إن مصر بتدعم الشعب الإسرائيلى -الشقيق المحتاج.... ياعينى- من قوت الشعب المصرى المسكين اللى أساساً مش لاقى ياكل .
خلى بالك إن الإتفاقية دى لمدة 20 سنة، وزى ما قال الكاتب مجدى الجلاد إن الدستور بيقول إن ناتج المناحم والمحاجر وإلخ ....ده ملك الشعب المصرى مش الحكومة المصرية يعنى قبل ما الحكومة تعمل إتفاقيات زى ديه لازم الأول تتطرح الإتفاقيات دى على مجلس الشعب اللى هوه يمثل الشعب وله الحق ان يوافق أو يرفض مش الحكومة لوحدها تاخد القرار.
وقال كمان إن احتياطى مصر مش هيكفى الإستهلاك المحلى وبالتالى التصدير ، يعنى فى الاخر هنشترى الغاز بالسعر العالمى وبعدين نبيعه ليهم برخص التراب والفلوس دى من دم الشعب المصرى... يا خراب بيتك يا مصر أصل العملية ناقصة........حسبنا الله ونعم الوكيل

العيش .... مره آخرى

الإستفزازيون

بينما يكافح الشعب المصرى يومياً من لقمة العيش، من أجل أن يوفر لنفسه وأسرته أبسط مقومات الحياة مقوما غلاء الأسعار وتدنى الأجور نجد لامبالاة من القيادات والوزراء المسئولة عن الشعب.
لسه قارى عن واحد اتنكر فى زى واحدة منتقبه فى طابور العيش علشان طابور الرجالة طويل اوى، فلما شكت الستات فى أمره وكشفوه نزلوه فيه ضرب همه والرجاله كمان، وجابولوه البوليس ... فقلهم أنا مرتبى 400 جنيه مقدرش اجيب العيش المش مدعوم أبو نص جنيه هيكلفنى 150 جنيه فى الشهر.. فالبوليس سابه.
وعلى الجهة الآخرى وزيران يرتدون ساعات يد تدنو على المليون جنيه مصرى فى حين الناس تقف طوابير على العيش المدعم يومياً ولا تخلو تلك الطوابير من امتهان لكرامة الإنسان، أنا لا أحسد هؤلاء الوزراء و لا حاجة أنا بس عيزهم يحسوا بالشعب إزاى هو لابس فى ايده ساعة بالتمن ده ويقدر يحس بمعاناة واحد فقير مش لاقى ياكل؟؟؟؟
موقف آخر وهو تدخل الرئاسة فى موضوع عصام الحضرى؟؟ ليه؟ ده وقته؟ الناس عماله تموت فى غزة وإحنا بنتكلم على الكوره وعن إيه واحد اساساً مش محتاج فلوس وعايز يروح بره علشان ياخد اكتر؟؟ بالذمة مش ده إستفزاز.
تحس من المواقف دى إن القيادات والمسئولين فى وادى والشعب فى وادى تانى

المواطن المصرى ووزرائه

هذا هو حال المواطن المصرى البسيط يصحو يومياً لكى يذهب إلى عمله، مصارعاً الزحام والغلاء محاولاً أن يحظى بعيشة هنية وسط دوامات الحياه، فهذا المشهد يتكرر يومياً فى جميع مناطق مصر التى تقطنها الطبقة الكادحة، النا س يتزاحمون على المواصلات فى إنتظار الميكروباص أو الأتوبيس حتى يتمكنوا من الذهاب إلى أشغلهم ليكسبوا قوت يومهم.
وهذا الزحام ليس على المواصلات فقط بل على أفران الخبز أكثر وأكثر ففى طريقى اليومى إلى العمل أعبر من أمام مخبز عيش بلدى فترى الناس ينتظرون على الأرصفة أمام الفرن فى عز البرد ينتظرون أن يفتح الفرن أبوابه لكى يحظوا بخبز اليوم لأن الميزانية لا تتحمل بند شراء الخبز الغير مدعوم.
على النقيض تماماً ترى وزيراً كما نشرت صحيفة الدستور يرتدى ساعة يد يقدر ثمنها بـ 110 ألف يورو!!
هذه هى مصر؟؟

الرسوم المسيئه و وهن العالم الإسلامى

السلام عليكم ورحمة الله وبركاته
للأسف ولمرة آخرى نشرت 17 صحيفة دنماركية الرسوم المسيئة -لسيدنا محمد صلى الله عليه وسلم- فى تحد سافر وواضح لكل العالم الإسلامى.
ولم تحرك الدول الإسلاميه ساكناً إزاء هذا الموقف فلم نسمع عن دولة تنطعت و قطعت علاقتها السياسية أو الإقتصادية مع الدنمارك، ما هذا الضعف والوهن، كل ما قام به العالم الإسلامى هو عقد المؤتمرات والندوات للدفاع عن رسول الله وكأن الدنماركيون سيستمعون لذلك بل على العكس لقد سمعنا بعض الوزراء الأوروبيون يتحدثون عن إعادة نشر الصور فى صحف دولهم.
للأسف أصبحنا أمة لا وزن لها كثيرى العدد ولا صوت لنا كما قال رسولنا الكريم كغثاء السيل.
انها جملة سمعتها تلخص موقفتا الحالى:
الدنماركيون منهم الزلل ومنا الخلل، وسيبقى الزلل ما بقى الخلل

وثيقة البث الفضائى

وثيقة البث الفضائى

صدّق وزراء الإعلام العرب في القاهرة يوم 12 فبرايرعلى وثيقة تحمل اسم "تنظيم البث الفضائي الإذاعي والتلفزيوني في المنطقة العربية" و تحتوي على 13 بندا يتأكد من دراستها القانونية والإعلامية أنها تهدف للحد من حرية الرأي والتعبير تحت ستار الحماية والتنظيم.والجدير بالذكر أن مصر والسعودية هما صاحبتا المبادرة فى تلك الوثيقة.

وقد رفضت قطر التصويت لصالح ذلك القرار وأدان الإعلام لفرنسى ذلك القرار بشدة.

ويأتى هذا القرار فى إطار تكميم الإعلام العربى ولا عزاء للحريات التى تتشدق بها الحكومات العربيه، وإستمراراً لحالة القمع العامه التى يعيشها الوطن العربى.

و لا عزاء ايضاً لمنظمات حقوق الإنسان، وليظل المواطن جاهلا لايعرف ما يدور حوله من انتهاكات لحقوقه حتى تطمئن الحكومات ولا يصبح هناك تواجد للبرامج التى تعكر صفوها وتفضح خفايا أمورها.