السيد اوباما عندنا..

اوباما سيلقى خطاب تاريخى من جامعة القاهره للعالم الاسلامى...

زياره تاريخيه للرئيس الأمريكى...

مصر محط  انظار العالم...

مش عارف ايه التهويل ده كله وتاريخ ايه وجغرافيا ايه اللى بيتكلموا عليها، الموضوع كله انه واحد مزنوق فى كلمتين وجه يقولهم عندنا، وبعد ما قلهم فضل الحال على ما هوعليه..

لا فلسطين قامتلها دوله، ولا امريكا بقت تعامل العرب والمسلمين زى ما بتعامل اسرائيل، ولا مصر بقت من دول العالم الأول ومن كبرى الدول الصناعيه المؤثره فى الاقتصاد العالمى...

احنا بتوع تهويل وبروباجندا زائفه زياده عن اللزوم، زى ما يكون زيارته هى اللى هاتحل كل مشاكل البلد؟؟؟

ولا الاستعدادت الأمنيه الرهيبه وقفل الشوارع ... يمكن الحسنه الوحيده فى الموضوع ده كله انهم وضّبوا فى البلد شويه وجامعة القاهره..

وبالنسبه لى زيارته جت على دماغى لأنهم نقلوا الميكروباصات من موقف السيده عائشه- عشان سيادته رايح مصر القديمه يزور مسجد السلطان حسن- ومكنتش لاقى حاجه اروح بيها الشغل وتسأل الرتب اللى واقفه هناك يصدرلك وش البلاهه ويقولك مش عارف!!.... امال مين اللى يعرف مش انتوا اللى شيلتوه وكأن حاجه ما حصلتش ولا كأن فى ناس بتركب من الموقف ده.... كالعاده اخر حاجه بيفكروا فيها المواطن المصرى ده اذا فكروا فيه اصلاً.

انا بيتهيألى ...لا متأكد ان اوباما مابيعملولوش كده فى امريكا لما بيبقى رايح حته هناك.

على العموم ياريت متكررهاش تانى وبطل اقوال وعايزين افعال...

........

Hopeless.... Don't ask me why???

القاهره - دبى

بناء على طلب الجماهير الغفيره سوف ألخص ما مميزات دبى و عيوبها مقارنتاً بالقاهره وذلك ن خلال زياره قصيره لدبى مدتها شهران.

نبتدى من اول مكان تطأه قدمك فى اى دوله وهو المطار... مطار دبى حاجه عشره على عشره نظام وجمال، على بال ماتخلص اوراقك وكده تطلع تلاقى الشنط على السير وهب تاخدها وتخلع... فى القاهره فضلنا واقفين يجى ربع ساعه مستننين الشنط بتاعتنا علشان تبدى تيجى على السير؟؟؟

وده اكيد على بال ما جابوا العربيه وحملوها بالشنط من الطياره وبعدين ابتدوا يحطوها على السير، دبى بقى لأ لأن فيه Tunel اللى هو الممر الأنبوبى ، ياخدك من المطار لغاية باب الطياره لكن فى القاهره لازم تطلع وتركب الباص عشان يوصلك للطياره؟؟

ده غير الهرجله والتجمهر وانت طالع من المطار قدام مخرج الجمارك، مافيش اى نظام او ترتيب الناس واقفين على مزاجهم ولا طابور ولا نظام ، نظام عافيه وبلطجه.. ده غير السيد بتاع الجمارك اللى بيفتش بالشبه بعد ما يسألك سؤال أهبل: بقالك اد ايه مارجعتش؟؟   قال يعنى لو مرجعتش من مده هترجع شايل اللى مايتشالش؟؟؟

اللى بعده...الطرق فى دبى  ينفع يتلعب عليها سباقات الفورملا وان.. اظن مش محتاجه تعليق اكتر من كده!

كمية ناطحات سحاب مبالغ فيها شويتين زى ما تكون موضه! حتى ان اطول برج فى العالم موجود هناك؟

طبعا التاكاسى واتوبيس الانتقالات الداخليه ما اقولكش احسن من احسن سوبر جيت عندنا..، فى مره نسيت الكاميرا فى التاكسى.. طلبت الشركه الخاصه بالتاكسى بلغوا السائق وجالى بالكاميرا معززه مكرمه.

التزام تام بقوانين المرور والتقاطعات والاشارات معموله صح وبذمه لتجنب وتقليل حدوث الحوادث، اغلبية الحوادث هناك نتيجة السرعه.

أسلوب الخدمه فى المطاعم والاماكن الخدميه للناس حاجه تمام التمام.. طبعا عندنا مش محتاجه كلام؟؟!!

اللى بجد يعيب دبى انها فقدت هويتها العربيه الإسلاميه، المنطقه اللى كنت فيها مكنتش باسمع فيها الأذان خالص؟؟؟ 

وانها منفتحه زياده عن اللزوم، الأجانب وخاصة الأوروبيين واخدين راحتهم وزياده...

الهنود مستوليين على معظم المهن هناك تحس ان دبى فرع تانى للهند؟؟

بالنسبه للحيويه والشعبيه والطبيعه الحشريه للبشر طبعا القاهره تتفوق بدون جدال دى بجد من اجمل الحاجات اللى فى مصر انها مابتنامش.

فى اى وقت فى اليوم فيها حياه..

 

طبعا المميزات دى كلها فى دبى نتيجه الامكانيات الرهيبه والمستوى المعيشى المرتفع.

ونهاية القول مصر أم الدنيا وعماااااار يا مصر..، وباب النقاش مفتوح لأى حد عايز يسأل عن حاجه نسيت اقولها او قولتها..

عودة الرحّاله ابن فطوطه

اخيرا وبعد شهرين ونصف من الترحال عدت الى البيت الكبير مصر والبيت الصغير حجرتى وسريرى المتواضع...

بدء من أسبوع تدريب فى اسكندريه، الى شهرين برده تدريب فى دبى وانتهاء بأسبوع شغل فى صحراء جنوب سيناء... اخيرا عدت الى البيت...

اكيد الواحد شاف واتعلم حاجات جديده وزى ما بيقولوا فى السفر سبع فوايد وحاجه كويسه كمان انك بتكسر ملل وروتين الحياه اليومى المعتاد وبتتعرف على ناس جديده وثقافات وفكر جديد خصوصا لو سفرت بره البلد.

اكيد برده فى مواضيع كتير حابب اتكلم عنها وتشاركونى الرأى فيها... بس اصبروا عليا شويه اشم نفسى وخصوصا كمان اننا فى شم النسيم مافيش احسن من كده مناسبه اشم نفسى فيها...

وطبعا ما انساش اشكر كل اللى وقف جنبى ايام امتحاناتى ودعالى والحمد لله ربنا استجاب ليهم وكلل دعواتهم بالإجابه ونجحت...

سلام مؤقت لحين اللقاء قريبا ان شاء الله.

يوم الامتحان...

دعواتكم يا جماعه عندى امتحان مهم يوم الخميس الجاى ان شاء الله... اهم امتحان فى القرص بتاع دبى

شدوا حيلكوا معايا فى الدعوات كده عشان مانساكوش فى الهدايا وانا جاى ان شاء الله

الواحد رجع تانى يفتكر ايام الكليه والمذاكره والامتحانات...ما صدقت خلصت

يلا ..اوصيكم بالدعاء ...ربنا ما يزنوقوا فى امتحان....

اخيراً... نور حراً طليقاً

أخيراً تم الإفراج عن أيمن نور بعد قضائه ما يقرب من اربع سنوات داخل سجن النظام المصرى، وبعيداً عن السبب الرئيسى وراء خروج

نور ان كان لضغوط امريكيه او حتى يمكن مبارك من زيارة البيت الأبيض كما قالت الواشنطن بوست أو تحت ستار أسباب صحيه كما قال

النائب العام...

أى كان السبب فالمهم هو خروج نور من محبسه وإستئنافه لعمله السياسى.....

الخبر كان له وقع جميل وأجمل ما فيه أنه كان مفاجئاً....

..... نورت يا نور .....

ما حدش عايز حاجه من دبى؟؟

انا الأن فى دبى فى تدريب خاص بالشركه اللى باشتغل فيها لمدة شهرين وامتحانات بقى وحاجات تفكرك بأيام الكليه.

المهم لسه ماكملتش اسبوع وابتديت افتقد مصر بجد، مع كل التقدم الرهيب فى دبى الا انها ليست مفعمه بالحياه زى مصر.. فعلا صدق اللى قال مصر ام الدنيا مش حكايه وطنيه وانتماء اوى قد ما هى حكاية ألفه...

يعنى هنا مثلاً متقليش سواق ميكروباص بيحدف عليك ولا تلاقى غسيل منشور من احدى البلكونات عمال يهفهف ولا تلاقى واحد معدى مش عارف بيبيع ايه عمال ينادى عليه ولا تلاقى ناس ماشيين كتير فى الشوارع تقريباً هنا مبتلاقيش حد ماشى فى الشوارع الا فى مناطق الأسواق غير كده البلد هسهس عربيات عماله بتجرى فى طرق معموله بذمه زيادة عن اللزوم وعمارات شاهقة الارتفاع برده زياده عن اللزوم ةايضاً فارهه زياده عن اللزوم.

مافيش الشوارع المفعمه بالحياه بتاعة مصر..

يمكن لما ارجع مصر ان شاء الله افتقد الجو بتاع دبى جايز !!!

المهم دعواتكم اعدى فى التدريب ده لحسن العمليه جد وامتحانات مفيش هزار...

سلام الى حين نلتقى واللى عايز حاجه يبعتلى...