القفا المتين... للشعب المسكين!!

لم تكد الناس تفرح بالعلاوه الـ 30% حتى اعلن مجلس الشعب اليوم بدء مناقشاته زيادات بعض الأسعار ورفع الضرائب على بعض المنتجات والمؤسسات، وإن كانت السلعه الأهم التى تنوى الحكومه رفعها هى الوقود بشتى انواعه...

فبص كده يا معلم وصحصح معايا:
البنزين 95 هيتباع بسعر 250 قرش، والبنزين 92 هيتباع بسعر 185 قرش، والبنزين 90 هيتباع بسعر 175 قرش، والسولار هيتباع بسعر 110 قرش....
أى ان ما أعطته الحكومه باليمين هتاخده اضعاف مضاعفه بالشمال...

وللى ماعندوش فكره وفاكر ان اسعار ارتفاع الوقود هتعود على اصحاب السيارات بس، اقوله انت غلبااااااااان..

ده التأثير المباشر فقط، لكن التأثير الغير مباشر واللى هيعود على الجميع اللى عنده واللى معندوش عربيه هو ان:

1- اسعار المواصلات كلها هتغلى واهمها الميكروباصات التى يركبها الجميع تقريبا يومياً والأنوبيسات والتاكسى و....

2- جميع اسعار السلع، ماتندهش اوى كده!! ايوه جميع اسعار السلع لأن كل السلع بلا استثناء يضاف لسعرها ثمن النقل من المحاصيل الزراعيه اللى بتجيلك من الدلتا والصعيد و.....

وسلملى بقى على الزياده، ده اذا كانت الزياده دى اساساً ليها لازمه، ومتحاولش ترفع لياقة القميص علشان تدارى القفا اللى خدته لأن الشعب كله مش انت لوحدك اللى خدته يا معلم...

واللى يغيظك ان واحد زى عبدالله كمال رئيس تحرير مجلة روزاليوسف العلمانيه يقولك القرار ده جيد جداً (نقلاً من مصراوى) لأن الوقود بيأتى فى المرتبه التاسعه او العاشره من السلع اللى هيزيد سعرها؟؟؟...

لك الله يا شعب مصر المسكين..

السلوك المصرى...زهقت!

بلاش تدوين سياسى النهارده.. خلينا نتكلم عن الشعب المصرى اللى هو انا وانت والناس اللى حوالينا، نظراً لتعددانا السكانى اللى مش كبير الإ لأنه مش متوزع صح على رقعة المساحه للبلد، فكلنا متكتلين فى حته واحده فحسين بالزحمه وما يترتب عليها.. بيقولك يا سيدى ان الزحمه كفيله بزيادة التوتر والسلوك العدوانى عند الناس، وبما ان احنا حياتنا كلها زحمه فبالتالى الكل متعصب ومش طايقه نفسه.. المهم لو حبيت تحلل السلوك المصرى..مش هتلاقى احسن من وسائل المواصلات علشان تحللها لأنها اكبر تجمع لناس من شتى الفئات والناس اللىمختلفين فى اتجاهات التفكير.. فلو نظرنا للأتوبيسات مثلاً: هتلاقى اللى فى حاله وده أندر نوعيه ممكن تلاقيها فى الشعب المصرى! وتلاقى الحشرى اللى حاطط مناخيره فى كل حاجه وده النوع الشائع، وشغال عمال يتكلم فى الفاضيه والمليانه....... يعنى مثلاً الدنيا زحمه فى الطريق، تلاقيه عمال ينصح فى السواق انه يدخل من الحته الفلانيه علشان الزحمه، ويضيع محطات كتير لأنه هيغير الطريق ومش مهم الناس اللى نازله فى المحطات دى اياكش يولعوا... ومره تانيه بس فى مينى باص السواق نفسه هو اللى غير خط مساره وطز فى الناس اللى راكبه ومحدش اعترض غير واحد ولما لاقيته لواحده اعترضت معاه بصراحه الواحد مبيستحملش المواقف دى اللى فيها لامبالاه من الناس..

بلاش سيبك من كل ده وخليك فى المترو اللى هو المفروض من افضل المواصلات فى مصر، هتلاقى الفوضى عامه فى طلوع الناس ونزولهم من المترو يعنى لوفيه راجل او ست كبيره يأما هيداس فى الرجلين او واحد ابن حلال هيديله كتف غير قانونى ينطره على الرصيف،
ده غير الشباب الروش اللى ملزق شعره بغباء ولابس مش عارف ازاى وتلاقيه مطلع الموبايل بتاعه عمال يسمع الخلق اللى عايز واللى مش عايز اغانى رغم أنوفهم وانت وحظك، بس فى الغالب الكل بيشغلوا اغانى بيئه متتسمعش.. ده غير الناس اللى بتيجى تحشر نفسها فى اى مكان وتضايقك تخليلك تحلف انك مش هتركب تانى..

ماشى كل ده وممكن تعديه غصب عنك معندكش بديل حتى لوكنت ممن الميسورين الحال ورحت الشغل بالعربيه هتلاقى السلوك فى السواقه زباله اللى بيكسر عليك واللى معنوش صبر ومش عايز يعديكن ده حتى الناس اللى ماشيه بتعدى من قدام العربيه فى لامبالاه رهيبه كأنه عايزك تدوسه علشان يخلص من حياته والناس اللى بتمشى عكسى وتلاقيها فى وشك قافله الطريق!!!

لكن كله كوم وان السلوكيات دى تظهر فى المساجد كوم تانى.. يعنى مثلاً اقربها النهارده انا بأصلى الجمعهن وخلاص الناس بتصطف للصلاه وكنت واقف جنب عامود.. تلاقى واحد كبير جاى يحشر نفسه بينك وبين العامود والمساحه اصلاً متكفيش فيضيايقك طول الصلاه ويحرمك من التركيز..... يعنى وطول ما أنت ماشى وعايش ياما هتشوف... متسائلاً امتى هينصلح حال سلوكيات الناس دى؟؟؟

لكن السلوك الأساسى والأعم اللى هتلاقيه فى شتى المعاملات والمواقف هو السلبيه واللامبالاه والإنتماء لحزب وأنا مالى، وهو ده اللى مخلينا واصلين للحاله دى من تمادى النظام فى فساده وطغيانه مع ان الناس عارفه الحق وساكته ومابتطالبش بيه ..... وعجبى!! مافيش فايده برضه دخلت على السياسه..!!

الإفراج عن إسراء....و مصير الفيس بوك

اخيرا... تم الإفراج امبارح عن إسراء بعد اعتقالها يوم 6 ابريل بتهمة التحريض على الإضراب..
إسراء صرحت بأنها تلقت معامله جيده داخل السجن وقالت أن ما حدث كان سوء تقدير منها لأنها فقط كانت تعبر عن خواطرها علي الانترنت، مؤكدة علي أنها لن تستخدم موقع فيس بوك الفترة المقبلة. (نقلاً من مصراوى)

بصراحه مش عارف اعلق اقول ايه؟؟ اللى حصل ده سوء تقدير؟؟ بسرعه كده اترجعتى بسرعه كده من أول ألم زى ما بيقولوا؟؟
أكيد التجربه صعبه ان واحد يدخل السجن واستجوابات وأمن دوله والكلام الكبير ده بس على الأقل مايقولوش التصريحات دى؟؟
وقال ايه مش هتستخدم الفيس بوك الفتره المقبله....
خلاص هى حره.. يا خسارة قلقنا وخوفنا عليها ومنادتنا بالإفراج عنها
المهم انها طلعت وخلاص!

وقريت برضه على مصراوى ان فيه اتجاه من الحكومه انها تحجب موقع الفيس بوك..
اهى هى دى الديموقراطيه ولا بلاش...

الدوله البوليسيه....و إسراء

حتى الآن لا تزال إسراء عبدالفتاح صاحبة دعوى اضراب 6 إبريل من خلال جروب الفيس بوك محتجزه لدى الشرطه، رغم اصدار النائب العام حكماً بالإفراج عنها.
وياليت القصه تقف عند هذا الحد فقط بل انها تمتد إلى انه بالإضافه لعدم امتثال الشرطه للقانون والاإفراج عن إسراء فإنها ايضاً لاتكشف عن مكان اعتقالها ... اى انها مخبياها ولاحد يعرف عنها اى اخبار ولا مكان اعتقالها ؟؟
هى دى حقوق الإنسان المحفوظه فى مصر؟؟
هى دى حقوق الإنسان اللى لما البرلمان الأوروبى انتقد مصر علشانها قامت الدنيا ومقعدتش بقيادة فتحى سرور؟؟

ولما عمر عفيفى طلع كتاب يقول للناس حقوقها عند التعامل مع الشرطه وواجباتها... طاردوه وصادروا الكتاب من المكتبات مع ان الكتاب لايتطاول على الشرطه ولكنه بيوعى الشعب.. هى دى برضه حرية الرأى اللى بيتشدق بها النظام ؟؟؟
وقاعدوا يطاردوا الراجل لغاية لما خلوا يسيب البلد خالص ويسافر امريكا...

المهم، انا مش عارف همه ليه لغاية دلوقت معتقيلنها، لاهى زعمية جماعه ارهابيه؟؟ ولا قياديه من قيادات المعارضه..
هى بس افتكرت انها فى بلد فيه حريات وفيه احترم لحقوق الإنسان...
ونسيت انها تعيش فى ظل نظام الدوله البوليسيه التى بان رعبها من شابه لا حول لها ولا قوه
اين منظمات حقوق الإنسان فى مصر.. واين دورها فى الإفراج عن اسراء ومباقى المعتقلين؟؟

احداث المحله..رساله للنظام

الصوره من روريترز لناصر نورى

المحله... اصبحت الان تتصدر اهتمامات كل المصريين لما حدث ويحدث بها..
فعلت ما لم تفعله اى محافظه اخرى فى البلد ثارت ورفعت صوتها عالياً من وطئة النظام المستبد..
تحولت الى ثكنه عسكريه... مصادمات مع الامن الذى بدوره ينفذ الأوامر دون تفكير او عقل راح ضحيته طفل لا ذنب له..
النظام المرعوب لجأ للأمن ليدارى خوفه.. استخدم الطرق الغير مشروعه من ضرب وسحل وتعذيب لارهاب الأهالى علشان محدش يستجرى ويفكر يعترض فاكرين انهم كده بيقضوا على المعارضه فى الشعب ميعرفوش انهم بيزودوا الحقد والعناد اللى عند الشعب وبيزودوا الفجوه بين الشرطه والشعب.

اعتقالات فى جميع المحافظات لكل الناشطين.. زعماء حركة كفايه وغيرهم.. حتى مصور رويترز عبدالناصر نورى اعتقلوه
الخوف مسيطر على النظام ... حتى اسراء عبدالفتاح صاحبة جروب دعوى الإضراب على الفيس بوك معتقيلينها.. النظام خايف من أى
دعوى لإبداء الرأى .. عايز الشعب مغلوب على امره يحركه بالريموت كنترول ..ازاى؟؟

فنظام لم يكفل لمواطنيه عيشه سويه ولا شربة ماء نقيه لم يحميه من ارتفاع الأسعار ومرتباته هزيله والبطاله فى تزايد مستمر والغنى بيزيد غنى والفقير بيزداد فقر.. كل العوامل دى مقدمات لإنفجار اذا النظام ماراجعش نفسه واتحرك فعلا لحل مشاكل الشعب..

فاحداث المحله انذار الشعب للنظام، فلعل النظام يستوعبه ..... اشك!

اضراب 6 ابريل ..نظره تحليليه

الصور نقلاً من موقع إضراب 6 إبريل

بصراحه انا من قبل الإضراب وانا من المتحمسين له، بس كنت حاطط لإضرابى سقف معين وهو انى هاروح الشغل بس مش هاشترى حاجه واهو برضه ابقى ساهمت..

لغاية صلاة العشاء كده وانا خلاص كنت حاطط فى بالى انى رايح، دخلت على النت اشوف ايه اخر اخبار الإضراب لقيت الحكومه منزله بيان على لسان الداخليه قال ايه تحذر المواطنين من الإضراب والتغيب عن العمل والإنسياق وراء القله المنحرفه.. قله منحرفه؟؟؟


طيب.. راحت كبرت فى دماغى وقولت طب انا بقى هاصعد مشاركتى فى الإضراب ومش رايح الشغل علشان ابقى من القله المنحرفه دى اللى بيقولوا عليها وانا عارف انها مش هتكون قله ان شاء الله.
المهم صحيت الصبح قمت مبلغ زميلى فى الشغل انى مش رايح لأنى مضرب، وقعدت على النت اتابع اخبار الإضراب..
لقيت جماعه من المدونين رايحين المحله لتغطية إضراب العمال هناك..كويس العمليه مبشره، المهم مستنى خبر من هنا او من هنا ..مش عارف اوصل..

فتحت التلفزيون، لقيت فى قناة البى بى سى العربيه مراسل من مصنع الغزل بالمحله بيقول ان مفيش اضراب من جانب العمال وان العمل ماشى دون اى بوادر للاضراب........اخ

هنا الضربه الكبيره اكبر تجمع للإضراب واللى كنت حاطط عليه الأمل .. ..فركش!!
ليه كده يا عمال المحله ده انتوا اللى ادتونا الأمل... الأمن حزم المصنع وقلبه ثكنه عسكريه بالإضافه لتظبيطهم بعض القيادات العمّاليه.
متابعه اخرى فى مواقع النت.... الشوارع خاليه وفيه سيوله مروريه كبيره.(كويس يعنى فى ناس كتير مارحتش الشغل..حلو اوى)
بجانب تواجد غزير ومكثف لقوات الأمن المركزى المرعوبه.

هب وسمعت عن مصادمات فى مدينة المحله مع الأمن وقنابل مسيله للدموع وانباء عن مصابين...استر يارب


المهم الحصاد الإجمالى ان انا فى رأى ان الإضراب نجح لعدة أسباب وهى:

1- بيان الحكومه اللى نزلته قبل الإضراب بيوم على لسان الداخليه..( معناه ان صوتنا وصل واتعملوه حساب)

2- التواجد الأمنى المكثف فى ميادين القاهره والجيزه.. حتى انى قريت ان مدير امن الجيزه بنفسه لبس ملكى ونزل يشوف الوضع!
ده معناه ان النظام خايف وجبان..

3- العنف اللى اتقابلت بيه مظاهرات المحله من قنابل مسيله وضرب نار وشتى انواع العنف... يكشف الوجه البوليسى المستبد للنظام.

4- استجابة قطاع كبير من الشعب لعملية الإضراب وتحرره من السلبيه مكسب كبير لخطوات جايه كتير


الخلاصه الإضراب بداية النهايه وبدايه لصحوة الشعب..

6 إبريل ....... مؤيد أم معارض

فى الفتره الأخيره انتشرت دعايا إضراب يوم 6 إبريل بطريقه مكثفه على المدونات ومواقع الإنترنت لتجميع أكبر عدد من الشعب ليتحدوا معاً على شىء واحد وهو إيصال أصواتنا الى ذلك النظام الكارهه لشعبه الغبر عابىء بمسئولياته تجاهه، ليشعروا ان لدينا قوة ضغط ولسنا بائعى كلام او مرددى شعارات بدون أفعال.
وانقسم الناس بين مؤيد ومعارض لهذا الإضراب...

فالمعارض يقول بأ ن النظام لن يعبىء بتلك الإضرابات والمقاطعات وان اللى بيتعمل ده مش هيجيب اى نتيجه ولا أى تأثير..
على العكس تماماً المؤيد فيرى ان الإضرابات وسيله جيده جدا لرفع صوته والتعبير عما بداخله.

وللعلم فإن تلك الإضرابات والمظاهرات السلميه تسبب صداعاً كبيراً فى رأس النظام ولا يهدأ له بال حتى تنتهى، وتستطيع ان ترى ذلك من كثافة قوات الشرطه والأمن المركزى الذين يسدون الشوارع خوفاً من جماعه لا تملك الإ أصواتهم ولافتاتهم المعارضه فلك ان تتخيل جبن النظام من خلال تلك المشاهد.

بصراحه انا من المؤيدين ..... فكفايه فى اليوم ده انك ماتشتريش أى حاجه تضامناً ضد الغلاء الفاحش فى الأسعار.
واضربات العمال الرهيبه التى خير مثال لها إضراب عمال غزل المحله الذى فتح الباب أمام كثير من الموظفين والعاملين المهضومين الحقوق لكى يطالبوا بحقوقهم دون خوف او ذعر، وانى ادعو الله ان يتم اضراب عمال غزل المحله على خير ويتم تحقيق اهدافهم ومطالبهم التى هى شريعه ومطالب لأى موظف او عامل فى اى دوله محترمه.
فالبلد لن تتحرك لأمام طالما ظللنا مكتوفى الأيدى وسلبيين لا نقوم بأى دور لرفع ذلك الظلم الجاثم على صدرونا..