حتى المترو... عمار يا مصر؟!!

بسرعه كده ومن غير لف و دوران ومقدمات ملهاش لازمه...

إذا كنت ركبت مترو الأنفاق امبارح ما بين الساعه الثالثه وحتى السابعه مساء.. وقاعد بتقرأ الكلام ده دلوقت فأحمد ربنا وبوس ايدك وش وضهر انك لسه عايش.. وإذا كنت مركبتوش من أساسه امبارح(زى حالاتى) فأنت سعيد الحظ برضه...

عارف ليه سيادتك؟

لأن فى الفتره الزمنيه دى يا معلم اللى هى اربع ساعات كامله كانت سيادتك غرفة التحكم الرئيسيه اللى فى رمسيس مش عارفه أمكان قطارات المترو ...فين؟؟؟؟

ايوه بجد مش بهزر ولا جايب الكلام ده من عندى .... الكلام ده منشور فى جريده المصرى اليوم النهارده وده سعادتك علشان كابل التحكم المسئول عن الكلام ده مقطوع ؟؟؟ وكانوا بيطمنوا على أمكان القطارات بالموبايلات ؟؟؟
وعمار يا مصر...

وداعاً عبدالوهاب المسيرى..

لا أجد ما أكتبه لأرثى د. عبدالوهاب المسيرى.....
إنا لله وإنا إليه راجعون
رحيل عالم وكاتب ومفكر وسياسى.. تنعاه مصر والمصريين اللى بجد....
لا يسعنى الوقت لسرد إنجازاته، ولكن كفايه ان نقول انه مواطن مصرى يحب مصر بجد ..
كفايه انه فى ايامه الأخيره كان بيصارع المرض وكان بينزل المظاهرات ويستحمل المضايقات الأمنيه ولا شباب العشرين.. ليضرب للشباب المثال والقدوه.
وابت الحكومه ان تعالجه على نفقتها لأنها تفرغت لعلاج الرقصين والفنانين وتركت عقول مصر المفكره..
وتكفل بعلاجه أمير سعودى... حكومه تكسف
رحم الله رجل اثرى المكتبه العربيه والمصريه ولم يضن عليها بأى جهد او ذرة عرق
وفعلت خير الحكومه حينما لم تتواجد فى تشييع جنازته.. فشيعها شرفاء ومفكرين البلد..
رحمك الله واسكنك فسيح جناته... فأنت فى قلب و وجدان كل مصرى..

إلى وزيرى التضامن الإجتماعى.. والصحه!!

بما اننا فى زمن التطور الطبيعى للحاجه الساقعه وكل حاجه تانيه.. فقد ساقنى حظى العثر أن أكون شاهداً على التطور الطبيعى لرغيف العيش..
واحد يقولى إشطه هو الرغيف اتطور .. اقوله أنا متفرحش اوى كده وركز فى اللى جاى...

بص يا معلم .. وأنا قاعد بتغدى لا بيا ولا عليا .. هب مدت ايدى وخدت رغبف معرفش ايه اللى خلانى اعمل حركه زى دى مع انى مش من اكيلة العيش اوى، لكن القدر لازم يلعب دوروه ..

المهم (خد بالك من اللى جاى ده) كلت منه بضع لقيمات، ومعرفش ايه الهاتف اللى جانى وخلانى بعد ما كلت من الرغيف انى اقسمه نصين؟؟ علشان يمكن حسيت انى مش هاقدر اكمله ؟؟ جايز.. المهم .. بعد تقريباً ما تلات اربع الرغيف اتقسم ولسه داخل على الربع الأخير لقيتلك حاجه سوده مديه على رمادى فى قلب الرغيف من جوه..
دققت النظر شويه... اده؟؟ ياااااااااااااااااااااااع ... ايه القرف ده؟ دوده فى قلب الرغيف.. وجتلى حالة غثيان و قمت طبعاً سايب الأكل ومقدرتش أكمل..

شوفت بقى التطور الطبيعى للرغيف بعد المسمار تلاقى دوده أو شىء من فصيلة الحشرات (دقق فى الصوره.. معلش ممكن متبقاش باينه اوى لأنها بكاميرة الموبايل بتاعى)
يمكن علشان الحديد دلوقتى مولع نار ومحدش لاقيه فا مبقاش فيه مسامير فدوروا على حاجه تانيه كبديل!!

ممكن واحد يقولى يا حظك ان انت قدرت تجيب رغيف اصلاً، جاى تدورلى على جودة الرغيف مش لما نلاقيه؟؟!!

المهم انا بابعت الموضوع ده للسيدان وزيرى الصحه والتضامن الإجتماعى.. وعمار يا مصر..

المركب اللى تودى

و فجأه بينما هم منهمكون فى اداء عملهم اليومى، إذ دلف أحدهم إلى الغرفه وقال لهم: مش فلان الفلانى اتنقل مش عارف فين (حته ورا الشمس كده بشويه)
ولأن فلان الفلانى هذا يتمتع بشعبيه جارفه ولكن من الجهه السلبيه، تهللت أساريرهم وصاحوا فى صوت واحد كأنهم اتفقوا عليه مسبقاً:
المركب اللى تودى...

دايماً الواحد لما يكون مخنوق من حد، وبعدين يعرف انه راح مش عارف فين يقول بتلقائيه المركب اللى تودى... لأنه كان قرفان منه وكان كابس على مراوحوه.

مش عارف عدى على وقت كده زهقت من تصرفات وسلوك ناس بعينهم حولي، عارف انت كده فى ناس تحاول تبلعها متعرفش تلقيهم واقفين فى زورك، فجت فى بالى الفكره دى ليه نبقى سلبيين ونستنى لما يغوروا ونقول المركب اللى تودى؟؟
ليه احنا ما نسعاش ونجيب المركب دى ونوديهم؟؟

جت فى بالى الفكره دى وقعدت اسرح بخيالى، ياسلاااااااام لو جبت فلان وعلان وفلانه دول وقمت حاجزلهم على متن المركب اللى تودى دى! واذ احنا فى الميناء وانا بودعهم واديهم التذاكر وقلبى يقفز ويرقص فرحاً، ينساب صوت المذيعه الداخليه.. النداء الأخير على الساده ركاب المركب "اللى تودى" الصعود على متن المركب المتجه الى القاره القطبيه الجنوبيه (انتركاتيكا) فوراً، وهُب بسرعه بسرعه يركبوا المركب واستريح من وشهم.

يااااااااااسلااااااااااام، حلم جميل كان نفسى يبقى حقيقه، بس رجعت واصطدمت بالواقع...... هى دى الحياه لازم تشوف فيها من كل صنف ولون ولازم تتعايش مع الأشكال دى، ولازم تواجهه مشاكلك ماتهربش منها، وفى اقرب فرصه تحجزلهم على متن "المركب اللى تودى".

60 سنه على النكبه..والغاز

فى هذا الشهر من هذه السنه يمر 60 سنه بالتمام والكمال على احتلال إسرائيل للأراضى الفلسطينيه....
60 سنه من المعاناه والذل والهوان على الشعب الفلسطينى المسكين.... تشريد وتهجير وقتل واغتصاب للأرض والحقوق..
60 عام من سفك الدماء الفلسطينيه رجال وشيوخ، نساء وأطفال .....
60 عام من الوحشيه واللا آداميه....
60 عام من الصمت والهوان العربى قبل العالمى على المذابح والإنتهاكات الصهيونيه....





وبهذه المناسبه بدء ضخ الغاز المصرى رسمياً للكيان الصهيونى بأبخس الأسعار التى لاتقارن بالأسعار العالميه...
وذلك نظراً للحاله الإقتصاديه المزدهره التى تعيشها مصر، ومستوى دخل الفرد العاااااالى، وتخطى جميع فئات الشعب خط الفقر،،،
فبناء على ذلك قررت مصر دعم الشعب الصهيونى الفقير المسكين !! كى يستطيع امداد ترساناته العسكريه بالوقود اللازم لكى تشوف شغلها مع الشعب الفلسطينى على أكمل وجهه!!!

القفا المتين... للشعب المسكين!!

لم تكد الناس تفرح بالعلاوه الـ 30% حتى اعلن مجلس الشعب اليوم بدء مناقشاته زيادات بعض الأسعار ورفع الضرائب على بعض المنتجات والمؤسسات، وإن كانت السلعه الأهم التى تنوى الحكومه رفعها هى الوقود بشتى انواعه...

فبص كده يا معلم وصحصح معايا:
البنزين 95 هيتباع بسعر 250 قرش، والبنزين 92 هيتباع بسعر 185 قرش، والبنزين 90 هيتباع بسعر 175 قرش، والسولار هيتباع بسعر 110 قرش....
أى ان ما أعطته الحكومه باليمين هتاخده اضعاف مضاعفه بالشمال...

وللى ماعندوش فكره وفاكر ان اسعار ارتفاع الوقود هتعود على اصحاب السيارات بس، اقوله انت غلبااااااااان..

ده التأثير المباشر فقط، لكن التأثير الغير مباشر واللى هيعود على الجميع اللى عنده واللى معندوش عربيه هو ان:

1- اسعار المواصلات كلها هتغلى واهمها الميكروباصات التى يركبها الجميع تقريبا يومياً والأنوبيسات والتاكسى و....

2- جميع اسعار السلع، ماتندهش اوى كده!! ايوه جميع اسعار السلع لأن كل السلع بلا استثناء يضاف لسعرها ثمن النقل من المحاصيل الزراعيه اللى بتجيلك من الدلتا والصعيد و.....

وسلملى بقى على الزياده، ده اذا كانت الزياده دى اساساً ليها لازمه، ومتحاولش ترفع لياقة القميص علشان تدارى القفا اللى خدته لأن الشعب كله مش انت لوحدك اللى خدته يا معلم...

واللى يغيظك ان واحد زى عبدالله كمال رئيس تحرير مجلة روزاليوسف العلمانيه يقولك القرار ده جيد جداً (نقلاً من مصراوى) لأن الوقود بيأتى فى المرتبه التاسعه او العاشره من السلع اللى هيزيد سعرها؟؟؟...

لك الله يا شعب مصر المسكين..

السلوك المصرى...زهقت!

بلاش تدوين سياسى النهارده.. خلينا نتكلم عن الشعب المصرى اللى هو انا وانت والناس اللى حوالينا، نظراً لتعددانا السكانى اللى مش كبير الإ لأنه مش متوزع صح على رقعة المساحه للبلد، فكلنا متكتلين فى حته واحده فحسين بالزحمه وما يترتب عليها.. بيقولك يا سيدى ان الزحمه كفيله بزيادة التوتر والسلوك العدوانى عند الناس، وبما ان احنا حياتنا كلها زحمه فبالتالى الكل متعصب ومش طايقه نفسه.. المهم لو حبيت تحلل السلوك المصرى..مش هتلاقى احسن من وسائل المواصلات علشان تحللها لأنها اكبر تجمع لناس من شتى الفئات والناس اللىمختلفين فى اتجاهات التفكير.. فلو نظرنا للأتوبيسات مثلاً: هتلاقى اللى فى حاله وده أندر نوعيه ممكن تلاقيها فى الشعب المصرى! وتلاقى الحشرى اللى حاطط مناخيره فى كل حاجه وده النوع الشائع، وشغال عمال يتكلم فى الفاضيه والمليانه....... يعنى مثلاً الدنيا زحمه فى الطريق، تلاقيه عمال ينصح فى السواق انه يدخل من الحته الفلانيه علشان الزحمه، ويضيع محطات كتير لأنه هيغير الطريق ومش مهم الناس اللى نازله فى المحطات دى اياكش يولعوا... ومره تانيه بس فى مينى باص السواق نفسه هو اللى غير خط مساره وطز فى الناس اللى راكبه ومحدش اعترض غير واحد ولما لاقيته لواحده اعترضت معاه بصراحه الواحد مبيستحملش المواقف دى اللى فيها لامبالاه من الناس..

بلاش سيبك من كل ده وخليك فى المترو اللى هو المفروض من افضل المواصلات فى مصر، هتلاقى الفوضى عامه فى طلوع الناس ونزولهم من المترو يعنى لوفيه راجل او ست كبيره يأما هيداس فى الرجلين او واحد ابن حلال هيديله كتف غير قانونى ينطره على الرصيف،
ده غير الشباب الروش اللى ملزق شعره بغباء ولابس مش عارف ازاى وتلاقيه مطلع الموبايل بتاعه عمال يسمع الخلق اللى عايز واللى مش عايز اغانى رغم أنوفهم وانت وحظك، بس فى الغالب الكل بيشغلوا اغانى بيئه متتسمعش.. ده غير الناس اللى بتيجى تحشر نفسها فى اى مكان وتضايقك تخليلك تحلف انك مش هتركب تانى..

ماشى كل ده وممكن تعديه غصب عنك معندكش بديل حتى لوكنت ممن الميسورين الحال ورحت الشغل بالعربيه هتلاقى السلوك فى السواقه زباله اللى بيكسر عليك واللى معنوش صبر ومش عايز يعديكن ده حتى الناس اللى ماشيه بتعدى من قدام العربيه فى لامبالاه رهيبه كأنه عايزك تدوسه علشان يخلص من حياته والناس اللى بتمشى عكسى وتلاقيها فى وشك قافله الطريق!!!

لكن كله كوم وان السلوكيات دى تظهر فى المساجد كوم تانى.. يعنى مثلاً اقربها النهارده انا بأصلى الجمعهن وخلاص الناس بتصطف للصلاه وكنت واقف جنب عامود.. تلاقى واحد كبير جاى يحشر نفسه بينك وبين العامود والمساحه اصلاً متكفيش فيضيايقك طول الصلاه ويحرمك من التركيز..... يعنى وطول ما أنت ماشى وعايش ياما هتشوف... متسائلاً امتى هينصلح حال سلوكيات الناس دى؟؟؟

لكن السلوك الأساسى والأعم اللى هتلاقيه فى شتى المعاملات والمواقف هو السلبيه واللامبالاه والإنتماء لحزب وأنا مالى، وهو ده اللى مخلينا واصلين للحاله دى من تمادى النظام فى فساده وطغيانه مع ان الناس عارفه الحق وساكته ومابتطالبش بيه ..... وعجبى!! مافيش فايده برضه دخلت على السياسه..!!