رمضانيات

يمتاز شهر رمضان بجو جميل ليس له مثيل فى باقى الشهور

لمّة العيله اللى مابيشفوش بعض الإ فى المناسبات بتقوى صلة الرحم

الغذاء الروحانى الكبير من العبادات .. الصيام والقيام والزكاه .. كل ده بيديك طاقه روحانيه هائله تمشيك طول السنه لغاية رمضان اللى بعده..

مش عارف كده بحس ان شوارع البلد بتكتسى بجو جميل كده مش عارف اوصفه غير انه رمضانى.. لما تلاقى المساجد مليانه بالمصلين اللى منتظرين عفو ورحمة ربنا .. والشوارع المتزينه بالأنوار والزينه.. وموائد الرحمن والسحور فى الحسين أوالسيده..

جو المسحراتى والفانوس وبتاع الكنافه اللى بينصب نصبته من السنه للسنه..

حاجات كده بيتهيألى متلاقيهاش غير عندنا فى مصر

حاجات الواحد بيستناها من السنه للسنه...

اللهم أعنّا على صيام وقيام شهر رمضان إيماناً وإحتساباً وتقبله منا يارب العالمين

خيبه........ بالويبه

انا بصراحه مش عارف البلد دى فالحه فى ايه مافيش حاجه فالحين فيها غير الخيبه والوكسه يمكن هى دى الحاجه الوحيده اللى يمكن ننفرد بالصداره فيها عن باقى دول العالم....

حريقه مجلس الشورى ... اللى قعدت يومين ومحدش عرف يطفيها مش عارف 120 عربية مطافى و طيارات هليكوبتر بتاعه القوات المسحله بصراحه حاجه تكسف مفيش اى تخطيط او اداره للأزمات؟؟ والحمد لله ان ربنا ستر عالم بحالنا...

ولا الخيبه الكبرى فى بكين... 80 مليون بنى ادم مش عارفين يطلعوا بطل أوليمبى؟؟ حاجه تكسف!!
فيليبس الأمريكى بتاع السباحه جاب لوحده 8 ميداليات ذهب!!
والبحرين مع احترامى ليها اللى عدد سكانها مايجيش عشر سكان القاهره بس جابت ذهبيه واحنا 80 مليون ولكن كغثاء السيل مالوش فايده..
حاجه مسخره ورايحين يتخنقوا هناك .. قال الحكايه ناقصه فضايح..

رياضة ايه اللى بدور عليها مش لما البلد حالها ينصلح الأول فى التعليم ولا الصحه نبقى ندور بعد كده على الرياضه..
لأ ويقولك رياده عربيه .. ومصر أم الدنيا مش عارف أم الدنيا فى ايه؟؟؟.....فى الخيبه القويه

نفسى ..........

نفسى فى يومين إستجمام على البحر بدون اى هموم او مشاكل او تفكير فى الغد.........

حتى المترو... عمار يا مصر؟!!

بسرعه كده ومن غير لف و دوران ومقدمات ملهاش لازمه...

إذا كنت ركبت مترو الأنفاق امبارح ما بين الساعه الثالثه وحتى السابعه مساء.. وقاعد بتقرأ الكلام ده دلوقت فأحمد ربنا وبوس ايدك وش وضهر انك لسه عايش.. وإذا كنت مركبتوش من أساسه امبارح(زى حالاتى) فأنت سعيد الحظ برضه...

عارف ليه سيادتك؟

لأن فى الفتره الزمنيه دى يا معلم اللى هى اربع ساعات كامله كانت سيادتك غرفة التحكم الرئيسيه اللى فى رمسيس مش عارفه أمكان قطارات المترو ...فين؟؟؟؟

ايوه بجد مش بهزر ولا جايب الكلام ده من عندى .... الكلام ده منشور فى جريده المصرى اليوم النهارده وده سعادتك علشان كابل التحكم المسئول عن الكلام ده مقطوع ؟؟؟ وكانوا بيطمنوا على أمكان القطارات بالموبايلات ؟؟؟
وعمار يا مصر...

وداعاً عبدالوهاب المسيرى..

لا أجد ما أكتبه لأرثى د. عبدالوهاب المسيرى.....
إنا لله وإنا إليه راجعون
رحيل عالم وكاتب ومفكر وسياسى.. تنعاه مصر والمصريين اللى بجد....
لا يسعنى الوقت لسرد إنجازاته، ولكن كفايه ان نقول انه مواطن مصرى يحب مصر بجد ..
كفايه انه فى ايامه الأخيره كان بيصارع المرض وكان بينزل المظاهرات ويستحمل المضايقات الأمنيه ولا شباب العشرين.. ليضرب للشباب المثال والقدوه.
وابت الحكومه ان تعالجه على نفقتها لأنها تفرغت لعلاج الرقصين والفنانين وتركت عقول مصر المفكره..
وتكفل بعلاجه أمير سعودى... حكومه تكسف
رحم الله رجل اثرى المكتبه العربيه والمصريه ولم يضن عليها بأى جهد او ذرة عرق
وفعلت خير الحكومه حينما لم تتواجد فى تشييع جنازته.. فشيعها شرفاء ومفكرين البلد..
رحمك الله واسكنك فسيح جناته... فأنت فى قلب و وجدان كل مصرى..

إلى وزيرى التضامن الإجتماعى.. والصحه!!

بما اننا فى زمن التطور الطبيعى للحاجه الساقعه وكل حاجه تانيه.. فقد ساقنى حظى العثر أن أكون شاهداً على التطور الطبيعى لرغيف العيش..
واحد يقولى إشطه هو الرغيف اتطور .. اقوله أنا متفرحش اوى كده وركز فى اللى جاى...

بص يا معلم .. وأنا قاعد بتغدى لا بيا ولا عليا .. هب مدت ايدى وخدت رغبف معرفش ايه اللى خلانى اعمل حركه زى دى مع انى مش من اكيلة العيش اوى، لكن القدر لازم يلعب دوروه ..

المهم (خد بالك من اللى جاى ده) كلت منه بضع لقيمات، ومعرفش ايه الهاتف اللى جانى وخلانى بعد ما كلت من الرغيف انى اقسمه نصين؟؟ علشان يمكن حسيت انى مش هاقدر اكمله ؟؟ جايز.. المهم .. بعد تقريباً ما تلات اربع الرغيف اتقسم ولسه داخل على الربع الأخير لقيتلك حاجه سوده مديه على رمادى فى قلب الرغيف من جوه..
دققت النظر شويه... اده؟؟ ياااااااااااااااااااااااع ... ايه القرف ده؟ دوده فى قلب الرغيف.. وجتلى حالة غثيان و قمت طبعاً سايب الأكل ومقدرتش أكمل..

شوفت بقى التطور الطبيعى للرغيف بعد المسمار تلاقى دوده أو شىء من فصيلة الحشرات (دقق فى الصوره.. معلش ممكن متبقاش باينه اوى لأنها بكاميرة الموبايل بتاعى)
يمكن علشان الحديد دلوقتى مولع نار ومحدش لاقيه فا مبقاش فيه مسامير فدوروا على حاجه تانيه كبديل!!

ممكن واحد يقولى يا حظك ان انت قدرت تجيب رغيف اصلاً، جاى تدورلى على جودة الرغيف مش لما نلاقيه؟؟!!

المهم انا بابعت الموضوع ده للسيدان وزيرى الصحه والتضامن الإجتماعى.. وعمار يا مصر..

المركب اللى تودى

و فجأه بينما هم منهمكون فى اداء عملهم اليومى، إذ دلف أحدهم إلى الغرفه وقال لهم: مش فلان الفلانى اتنقل مش عارف فين (حته ورا الشمس كده بشويه)
ولأن فلان الفلانى هذا يتمتع بشعبيه جارفه ولكن من الجهه السلبيه، تهللت أساريرهم وصاحوا فى صوت واحد كأنهم اتفقوا عليه مسبقاً:
المركب اللى تودى...

دايماً الواحد لما يكون مخنوق من حد، وبعدين يعرف انه راح مش عارف فين يقول بتلقائيه المركب اللى تودى... لأنه كان قرفان منه وكان كابس على مراوحوه.

مش عارف عدى على وقت كده زهقت من تصرفات وسلوك ناس بعينهم حولي، عارف انت كده فى ناس تحاول تبلعها متعرفش تلقيهم واقفين فى زورك، فجت فى بالى الفكره دى ليه نبقى سلبيين ونستنى لما يغوروا ونقول المركب اللى تودى؟؟
ليه احنا ما نسعاش ونجيب المركب دى ونوديهم؟؟

جت فى بالى الفكره دى وقعدت اسرح بخيالى، ياسلاااااااام لو جبت فلان وعلان وفلانه دول وقمت حاجزلهم على متن المركب اللى تودى دى! واذ احنا فى الميناء وانا بودعهم واديهم التذاكر وقلبى يقفز ويرقص فرحاً، ينساب صوت المذيعه الداخليه.. النداء الأخير على الساده ركاب المركب "اللى تودى" الصعود على متن المركب المتجه الى القاره القطبيه الجنوبيه (انتركاتيكا) فوراً، وهُب بسرعه بسرعه يركبوا المركب واستريح من وشهم.

يااااااااااسلااااااااااام، حلم جميل كان نفسى يبقى حقيقه، بس رجعت واصطدمت بالواقع...... هى دى الحياه لازم تشوف فيها من كل صنف ولون ولازم تتعايش مع الأشكال دى، ولازم تواجهه مشاكلك ماتهربش منها، وفى اقرب فرصه تحجزلهم على متن "المركب اللى تودى".