........

Hopeless.... Don't ask me why???

القاهره - دبى

بناء على طلب الجماهير الغفيره سوف ألخص ما مميزات دبى و عيوبها مقارنتاً بالقاهره وذلك ن خلال زياره قصيره لدبى مدتها شهران.

نبتدى من اول مكان تطأه قدمك فى اى دوله وهو المطار... مطار دبى حاجه عشره على عشره نظام وجمال، على بال ماتخلص اوراقك وكده تطلع تلاقى الشنط على السير وهب تاخدها وتخلع... فى القاهره فضلنا واقفين يجى ربع ساعه مستننين الشنط بتاعتنا علشان تبدى تيجى على السير؟؟؟

وده اكيد على بال ما جابوا العربيه وحملوها بالشنط من الطياره وبعدين ابتدوا يحطوها على السير، دبى بقى لأ لأن فيه Tunel اللى هو الممر الأنبوبى ، ياخدك من المطار لغاية باب الطياره لكن فى القاهره لازم تطلع وتركب الباص عشان يوصلك للطياره؟؟

ده غير الهرجله والتجمهر وانت طالع من المطار قدام مخرج الجمارك، مافيش اى نظام او ترتيب الناس واقفين على مزاجهم ولا طابور ولا نظام ، نظام عافيه وبلطجه.. ده غير السيد بتاع الجمارك اللى بيفتش بالشبه بعد ما يسألك سؤال أهبل: بقالك اد ايه مارجعتش؟؟   قال يعنى لو مرجعتش من مده هترجع شايل اللى مايتشالش؟؟؟

اللى بعده...الطرق فى دبى  ينفع يتلعب عليها سباقات الفورملا وان.. اظن مش محتاجه تعليق اكتر من كده!

كمية ناطحات سحاب مبالغ فيها شويتين زى ما تكون موضه! حتى ان اطول برج فى العالم موجود هناك؟

طبعا التاكاسى واتوبيس الانتقالات الداخليه ما اقولكش احسن من احسن سوبر جيت عندنا..، فى مره نسيت الكاميرا فى التاكسى.. طلبت الشركه الخاصه بالتاكسى بلغوا السائق وجالى بالكاميرا معززه مكرمه.

التزام تام بقوانين المرور والتقاطعات والاشارات معموله صح وبذمه لتجنب وتقليل حدوث الحوادث، اغلبية الحوادث هناك نتيجة السرعه.

أسلوب الخدمه فى المطاعم والاماكن الخدميه للناس حاجه تمام التمام.. طبعا عندنا مش محتاجه كلام؟؟!!

اللى بجد يعيب دبى انها فقدت هويتها العربيه الإسلاميه، المنطقه اللى كنت فيها مكنتش باسمع فيها الأذان خالص؟؟؟ 

وانها منفتحه زياده عن اللزوم، الأجانب وخاصة الأوروبيين واخدين راحتهم وزياده...

الهنود مستوليين على معظم المهن هناك تحس ان دبى فرع تانى للهند؟؟

بالنسبه للحيويه والشعبيه والطبيعه الحشريه للبشر طبعا القاهره تتفوق بدون جدال دى بجد من اجمل الحاجات اللى فى مصر انها مابتنامش.

فى اى وقت فى اليوم فيها حياه..

 

طبعا المميزات دى كلها فى دبى نتيجه الامكانيات الرهيبه والمستوى المعيشى المرتفع.

ونهاية القول مصر أم الدنيا وعماااااار يا مصر..، وباب النقاش مفتوح لأى حد عايز يسأل عن حاجه نسيت اقولها او قولتها..

عودة الرحّاله ابن فطوطه

اخيرا وبعد شهرين ونصف من الترحال عدت الى البيت الكبير مصر والبيت الصغير حجرتى وسريرى المتواضع...

بدء من أسبوع تدريب فى اسكندريه، الى شهرين برده تدريب فى دبى وانتهاء بأسبوع شغل فى صحراء جنوب سيناء... اخيرا عدت الى البيت...

اكيد الواحد شاف واتعلم حاجات جديده وزى ما بيقولوا فى السفر سبع فوايد وحاجه كويسه كمان انك بتكسر ملل وروتين الحياه اليومى المعتاد وبتتعرف على ناس جديده وثقافات وفكر جديد خصوصا لو سفرت بره البلد.

اكيد برده فى مواضيع كتير حابب اتكلم عنها وتشاركونى الرأى فيها... بس اصبروا عليا شويه اشم نفسى وخصوصا كمان اننا فى شم النسيم مافيش احسن من كده مناسبه اشم نفسى فيها...

وطبعا ما انساش اشكر كل اللى وقف جنبى ايام امتحاناتى ودعالى والحمد لله ربنا استجاب ليهم وكلل دعواتهم بالإجابه ونجحت...

سلام مؤقت لحين اللقاء قريبا ان شاء الله.

يوم الامتحان...

دعواتكم يا جماعه عندى امتحان مهم يوم الخميس الجاى ان شاء الله... اهم امتحان فى القرص بتاع دبى

شدوا حيلكوا معايا فى الدعوات كده عشان مانساكوش فى الهدايا وانا جاى ان شاء الله

الواحد رجع تانى يفتكر ايام الكليه والمذاكره والامتحانات...ما صدقت خلصت

يلا ..اوصيكم بالدعاء ...ربنا ما يزنوقوا فى امتحان....

اخيراً... نور حراً طليقاً

أخيراً تم الإفراج عن أيمن نور بعد قضائه ما يقرب من اربع سنوات داخل سجن النظام المصرى، وبعيداً عن السبب الرئيسى وراء خروج

نور ان كان لضغوط امريكيه او حتى يمكن مبارك من زيارة البيت الأبيض كما قالت الواشنطن بوست أو تحت ستار أسباب صحيه كما قال

النائب العام...

أى كان السبب فالمهم هو خروج نور من محبسه وإستئنافه لعمله السياسى.....

الخبر كان له وقع جميل وأجمل ما فيه أنه كان مفاجئاً....

..... نورت يا نور .....

ما حدش عايز حاجه من دبى؟؟

انا الأن فى دبى فى تدريب خاص بالشركه اللى باشتغل فيها لمدة شهرين وامتحانات بقى وحاجات تفكرك بأيام الكليه.

المهم لسه ماكملتش اسبوع وابتديت افتقد مصر بجد، مع كل التقدم الرهيب فى دبى الا انها ليست مفعمه بالحياه زى مصر.. فعلا صدق اللى قال مصر ام الدنيا مش حكايه وطنيه وانتماء اوى قد ما هى حكاية ألفه...

يعنى هنا مثلاً متقليش سواق ميكروباص بيحدف عليك ولا تلاقى غسيل منشور من احدى البلكونات عمال يهفهف ولا تلاقى واحد معدى مش عارف بيبيع ايه عمال ينادى عليه ولا تلاقى ناس ماشيين كتير فى الشوارع تقريباً هنا مبتلاقيش حد ماشى فى الشوارع الا فى مناطق الأسواق غير كده البلد هسهس عربيات عماله بتجرى فى طرق معموله بذمه زيادة عن اللزوم وعمارات شاهقة الارتفاع برده زياده عن اللزوم ةايضاً فارهه زياده عن اللزوم.

مافيش الشوارع المفعمه بالحياه بتاعة مصر..

يمكن لما ارجع مصر ان شاء الله افتقد الجو بتاع دبى جايز !!!

المهم دعواتكم اعدى فى التدريب ده لحسن العمليه جد وامتحانات مفيش هزار...

سلام الى حين نلتقى واللى عايز حاجه يبعتلى...

زمن الذل والخنوع...

هذا هو اليوم الحادى والعشرون فى حملة إبادة أهل فلسطين فى غزه والوضع كما هو عليه من الحكام والعرب والمسلمين...

كأنهم يعيشون على ظهر كوكب آخر غير هذا؟؟ الكيان الصهيونى مستمر فى التذبيح والتقتيل فى الأطفال والنساء والمدنيين العزّل بأبشع الطرق وأشنعها وأحدث الأسلحه من البر والجو والبحر فى مواجهة مقاومه مكتوفة الأيدى تستخدم أبسط أنواع الأسلحه التقليديه... ولا حياة لمن تنادى!!

ولم تكتف إسرائيل بذلك بل تستخدم أيضاً الأسلحه المحرمه دولياً كالفسفور الأبيض الذى يسبب حروق تأكل الأنسجه الحيه وصولاً للعظام بل زادت على ذلك بإستخدام أنواع جديده من الأسلحه يتم تجربتها لأول مره ولم يجدوا خيراً من الفلسطينين العرب المسلمون لتجربتها عليهم... وايضاً لا حياة لمن تنادى!!

عدد الشهداء تجاوز الألف ومئة شخص والجرحى تجاوزوا الخمسة الآلاف، وكأنهم ليسوا ببشر وكأن إسرائيل قتلتهم فى لعبه من ألعاب البلاىستيشن والعالم كله يشاهد... ولا حياة لمن تنادى!!

مجلس الأمن اتخذ قراراً بوقف إطلاق النار مساوياً بين المعتدى والمقاوم الشرعى وحتى هذا القرار لم ولن تنفذه إسرائيل.. ولا حياة لمن تنادى!!

اسرائيل تستهدف المدارس والمستشقيات والصليب الأحمر ومقار منظمة الأونروا التابعه للأمم المتحده فى ظل وجود بان كى مون أمينها العام فى إسرائيل متحديتاً كل الأعراف.. ولا حياة لمن تنادى!!

أتعرفون كل ذلك لماذا؟

لأننا نحيا زمن الذل والخنوع والخضوع العربى والإسلامى..

لأننا ارتضينا بتلك الفئة الفاسده الحاكمه للوطن العربى...

لأننا تعاونا مع العدو ومع من وراء العدو فى مواجهة بنى جلدتنا...

لأننا ما نصرنا الله ورسوله حتى ينصرنا...

لأننا ارتضينا بكل المحاولات العبثيه من مفاوضات وتهدئات ومباحثات و...، دون فهم أن هذا الكيان يماطل ويماطل حتى ينال غرضه من النيل للفرات ولن يرضى بأقل من ذاك..

لذا فلا سبيل غير سبيل الجهاد...والإ فلتسرحوا الجيوش العربية كلها فلا فائدة منها، فهذا الكيان لن يُردع ولا سبيل الإ بإزالته عن الوجود.

أين زمن عزة الإسلام ومجده؟ أين المعتصم الذى حينما سُبيت إمرأه مسلمه من قبل الروم بعث لقائد روم برسالة يقول له فيها: إذا لم تعد تلك المرأة معززة مكرمة، فسأرسل إليك جيشاً أوله عندك وآخره عندى؟؟

أين الكرامة والعزة والنخوه؟ مفردات أصبحت غائبة عن قاموسنا اليوم وسوف تعود ان شاء الله وإن لم تكن بنا فبغيرنا فالنصر آت إن شاء الله...